Lok Sabha MP-i CAB benokdang madenba atema NPF-i aitsü

Kohima, February 22 (TYO): Hokolbarnü Nagaland Legislative Assembly (NLA) session agidang Opposition Naga People’s Front (NPF)-i sorkar dang Nagaland nungi Lok Sabha MP Tokheho Yepthomi-i Parliament nung Citizenship Amendment Bill (CAB) 2016 anema mesüra posema vote agütsü ta asüngdang.
MP NPF MLA Imkong L Imchen-i iba osang metetnüa asüngdangdang Chief Minister Neiphiu Rio-i “Parliament nung voting asüba osangji CM office-i mayur” ta dang ilangilanga langzü.
Opposition lennir T R Zeliang-ia “NDPP-i MP nem whip tetuyuba agütsü asü masü” ta asüngdangdang Rio-i “Parliament nung Bill benoktsübaji sorkari memetet liasü aser iba jagi whip magütsü” ta langzü.
CAB indang Parliament Committee-i January 7 nü osang agütsü aser sorkari tasüngji Lok Sabha nung bill benok. Ibaji Nagaland MP-i memetet liasü, ta Rio-isa ashi.
Lok Sabha nung mezüng CAB benokdang Rio MP teinyakdak liasü ta tanü opposition -i tai tongloktsü saka idangji pai ashiba agi “Bill benokba mapangji ni NPF party nungi anentsür aliba mapang liasü.”
Lok Sabha nung CAB benokdang MP Yepthomi maliasü aser NDPP-ia pa nem tetuyuba kecha magütsü, ta Chief Minister-i tanü nenshia metetdaktsü.
Ajisüaka, Opposition lennir TR Zeliang-i ashiba agi “Assembly mesüra Parliament nung teinyaktsü lateta aliba nung taruba anogo nung jembitsüba onüktem anogo ka jelia metetdaktsür. Anungji Parliament nungi tongtipang bill benokba anogo nung Nagaland nungi MP-i Zunheboto nung mapa kar inyaktsü atema ao ta ashibaji tejak meitsü atema tatemtsü amba dang lir.”
India sorkari PDA sorkar nema Bill indang draft agütsü aser state sorkar indang tebilembatem asüngdang. Anungji state sorkari Centre nem kechi telangzüba agütsü ta MLA Chotisuh Sazo-ia asüngdangdang Neiphiu Rio-i “India sorkar ket nungi iba ama shidi kecha mangu” ta langzü.
Head Master aser Assistant Headmaster: Tanü assembly nung Opposition MLA Yitachu-i sorkar school tem nung Head Master aser Assistant Headmaster indang metetnüa asüngdangdang Higher and Technical Education Minister Temjen Imna Along-i “Nagaland nung Government High Schools 246 lir aser item nungi 38 nung Head Masters (HMs) mali aser school 32 nungbo HMs aser Assistant HMs mali” ta langzü.
Item school nung Teacher in-charge-i ketdangsüa repranger aser administrative officers indang seniority atema okadak ken o benoka angadangba ajanga HM aser AHM mapa lemzüktsütsü makoker, ta paisa ashi.
CAWD: Chief Minister Rio-i tanü ashiba agi “Nagaland nung tang Administrative office buildings 16 aser General Administration Rest House 18 tashi teyangludak lir. Nagaland ket nung rongsen peria mali aser senotsü maliba ajanga mapang shitak nung tembanga meyangluteter. Ajisüaka, iba khuret ya 15th Finance Commission den lemsatepogo aser parnoki sen lemzüktsütsü imlar.”
Hornbill: Chief Minister Rio-i Minister in-charge of Tourism bena lir aser pai yaküm December ita Hornbill Festival osang metetdaktsüdang ‘iba benjung nung sorkari sen crore 8 ser meyirjang 82 endok’ ta ashi.
District jenjang nung Mini Hornbill Festival amungtsü atema sen crore 2.50 enoka lir aser iba nungi sen crore 1.50 agiogo aser cen crore 1 anünga lir, ta Rio-isa ashi.
Tang tashi nung Mini Hornbill benjung nung sen endokba: Tsungremmong (Ao), Mokokchung – Rs 15 lakh, Tsokum (Khiamniungan) Noklak – Rs 15 lakh, Yemshe (Pochury), Meluri – Rs 10 lakh, Chega Gadi/Meilegi (Zeliang), Peren – Rs 15 lakh, Tokhu Emong (Lotha) Wokha – Rs 15 lakh, Ahuna (Sumi) Zunheboto – Rs 15 lakh, Ngada (Rengma) TSeminyu – Rs 10 lakh, Poanglum (Chang) Tuensang – Rs 15 lakh, Mimkut (Kuki) Athibung – Rs 15 lakh, Bishu (Kachari) Dimapur – Rs 10 lakh, Sekrenyi (Angami) Kohima – Rs 15 lakh, and Sukrunye (Chakhesang) Phek – Rs 15 lakh.
Tanü assembly nung CM Rio, Deputy CM Y Patton aser Minister G Kaito Aye, Minister CM Chang aser Minister Neiba Kronu nungertemi sorkar department 15 indang Annual Administrative reports benok.