Lok Sabha nung 78.67% aser Aonglenden by-poll nung 84.3%-i vote enoktsü

Deputy CM-i votes aika enoktsüba aser BJP stole agiba atema ashishir.

Kohima, April 11 (TYO): Nagaland nung Lok Sabha menden atema vote enoktsür 78.67% aser Mokokchung district kübok 26-Aonglenden Assembly by-election nung vote enoktsür 84.3% liasü.
Tanü Lok Sabha election nung vote enoktsübaji 2014 küm dang nungi 9.15% agi tajemba liasü. Maneni, 2018 LS indang by-election nunga vote enoktsür 85.16% liasü.
Ajisüaka, Hokolbar anepdang 11:00 ako nung presiding official ajak indang kulikakettem reprangba sülen ang vote enoktsür osang jangjatsü, ta Chief Electoral Officer (CEO) Nagaland, Abhijit Sinha, IAS-i ashi .
Polling station 35 shi ka nung EVMs mapa meinyakba dak alaka polling tiptema dang agiogo, ta paisa ashi.
Nagaland nung vote enoktsür ajak agi 12,13,777 lir aser iba nung tetsür 5,98,503 aser tebur 6,15,274 lir. Vote enoktsürtem rongnung service voters 7415 dena lir.
Tanü vote teimba enoktsübaji Pughoboto election district liasü aser iba nung 93.93% liasü. Ano, vote tajemba enoktsüba district ji Peren liasü aser iba nung 64.43% dang liasü.
District sasep nung vote enoktsüba: Dimapur – 74.59%, Peren – 64.43%, Kohima – 64.43%, Pughoboto – 93.93%, Phek – 82.48%, Mokokchng – 83.16%, Zunheboto – 81.76%, Wokha – 85.95%, Mon – 88.43%, Longleng – 84.70%, Tuensang – 73.90% and Kiphire – 85.37%.
Nagaland nungi Lok Sabha menden ka atema candidate pezü toktep. Parnokji INC nungi K L Chishi, PDA consensus candidate & NDPP nominee Tokheho Yepthomi, NPP candidate Hayithung Tungoe aser Independent candidate Dr M M Thromwa Konyak nungertem lir.
“Deputy Chief Minister Y Patton-i BJP stole ka enoker Riphyim Old-III polling station nung vote enoktsüba indang onük onoki agizükogo. Iba tatalokba indang video prokshiba nung Deputy CM polling station-i aiba aser voters slip aika agütsür vote enoktsüba angur. Iba tatalokba atema Congress Party-i re-poll asütsü takhangba agütsüogo saka asüng ang iba atema telemtetba ka agitsü” ta Abhijit Sinha-i ashi.
Zunheboto district kübok Lumami nung taila EVM ka agütsü aser iba nung button tanga nung anem nunga signal ka dang agütsü ta onük ka adok saka iba osang bushitepa ao nung olulu dang liasü ta bushitet. District Election Officer-i Presiding Officer, Polling officials aser candidate indang agents lia EVM ji tendang, ta paisa shisem.
Tanü Chief Minister Neiphiu Rio-i Northern Angami-II A/C kübok Touphema nung vote enoktsü.
Opposition Leader T R Zeliang-ia Peren district kübok Jalukie nung aser NPF president aser taoba Chief Minister Dr Shurhozelie Liezietsu-i Kohima village nung L Khel nung vote enoktsü.
NDPP nominee Tokheho Yepthomi-i Dimapur-III A/C kübok Naharbari GPS polling station nung vote enoktsü.
INC candidate KL Chishi-i polling anogo nung par Constituency-i moutet ta olulu kar jembi saka Nagaland Pradesh Congress Committee indang Communication Department-i iba osang atema kuli kecha magütsü.
NPCC president K Therie-ia Phek district kübok Pfutsero Town nung vote enoktsü.
26-Aonglenden Assembly by-election nung Congress candidate Alemjongshi Longkumer aser NDPP nungi Sharingain Longkumer tsüngda toktep.
Aonglenden A/C nung vote enoktsür ajak agi 12,436 lir. Parnok rongnung tebur 6146 aser tetsür 6290 lir aser tanü 84.3% agi vote enoktsü.
Yaküm September ita MLA Imtikumzuk ajungbena asüba ajanga iba by-election agitsüsa aküm.
Kibong ka nung züngsem kati ajak atema vote enoktsüba onük atema asüngdangdang CEO-i ashiba agi “iba atema kulitem kecha mali aser ano proxy voting o booth capturing asüba indang mali” ta langzü.
Commissioner Nagaland aser Returning Officer M Patton-ia ashiba agi, “tan election ya balaka liasü kechiyong ozüng alema inyakba osang ka danga mangashi.”
Polling station 2227 ajak nung ama NDPP aser Congress indang Polling Agents liasü saka station aika nung NPP o Independent candidate tem indang polling agents maliasü.