Lok Sabha nung Anti-Terror Bill agizük

New Delhi, Chiteni/July 24 (Agencies): Tanü Lok Sabha nung kiralongra anema Anti- terror bill agizükogo; tanü Union Home Minister, Amit Shah-i, kiralongrartem madak mera ka agi law enforcement agencies tajungba akümtsü atema iba terror law yanglushitsü nüngdak, ta ashi.
Lok Sabha nung Unlawful Activities Prevention Act yanglushitsü atema benoka jembidang Shah-i, anti-terror laws ji tim masüba nung mamshitsü, ajisüaka kiralongra tera nungi atsüdoktsü atema dang amshitsü, ta ashi.
Pai ashiba agi, kiralongra agientsü atema kiralongra den sendaktepa aliba nisung ka dang ‘kiralongrar’ ta ashitsü atema UAPA (amendment) bill ya nüngdak.
Iba amendment bill anema nokdakba atema Congress Party aija Shah-i, UPA sorkari parnok mapang nung anti-terror laws yanglushira NDA sorkaria yanglushitettsü, ta ashi.
“Sorkari kiralongra anema rarar aser iba nungji sorkar balala mashishitsüla,” ta Shah-i ashi.
Maoists telungpurtem tebilemtsü dak sendakba nung Shah-isa, “Tangatetba tenüng nung ajemdaker nisung kari urban Maoism ajungkettsür. Onoki parnok atema mebilemtsür,” ta pai ashi.
“Iba ozüng nükjidong ya kiralongra agientsü atema dang lir. Iba ozüng tim masüba nung mamshitsü atema onoki inyaktsü,” ta pai ashi.
Taoba mapang Ato kilonser Indira Gandhi leniba nung Congress Party-i UAPA ya benoka liasü, ta shia pai opposition party aitsü.
Alia oa sayutsüngirtemi tesempa aser kiralongra tangatetba proker, ta shia Shah-i, kiralongra ya reju ka masü saka nisung ka melungjang nungi adoker, ta ashi.
“Kiralongra tera nungi atsüdoka indoktsüji sorkari teinyaktsü mapa lir,” ta paisa ashi.