Lok Sabha nung bill pongu benok

New Delhi, December 18 (Agencies): Hombarnü Lok Sabha nung Congress Party-i, Ato kilonser, Narendra Modi-i taoba Ato kilonser, Manmohan Singh mezüngmeshia jembi, ta tai tonglokja longkak aitba ajanga senden thinen.
Tanü senden nung sorkari Bill pongu benoktsü merang, ajisüaka Zero Hour mapang nung Congress aser Left party züngsemtemi onük kar benoktsü takhangba agüja rongrong adokdaktsü.
Opposition-i takhangba agüja rongrong adokdaktsüdang Bill pongu benok, iba den külemi minister tem sangdong aser standing committee reports balala benoka liasü.
Union Finance Minister, Arun Jaitley-i ‘Supplementary Demand for Grants – Second Batch for 2017-18’ benoka liasü.
Congress züngsemtemi Ato kilonser anema yimyim ayima pai Singh anema jembiba atema tatok meshitsü takhangba agütsü, iba den külemi Left party züngsemtemi onük balala benoktsü takhangba agütsü. Ibayongji Speaker, Sumitra Mahajan-i khen atema senden thiena ayu.
Tanü benokba bill ponguji: ‘The National Council for Teacher Education (Amendment) Bill’, ‘The Payment of Gratuity (Amendment) Bill’, The Dentists (Amendment) Bill’, ‘The Indian Forest (Amendment) Bill’ aser ‘The Representation of the People (Amendment) Bill’ liasü.
Ano maneni senden tenzükdang BJP züngsemtemi Ato kilonser, Modi aser party tenüngsanga yimyim ayim, iba den külemi opposition-ia kasa takhangba agütsü. Iba den külemi opposition züngsem kari Odisha nung tzümetsüng lendong onük benoka liasü.
Senden nung Mahajan-i Andhra Pradesh nung rong lendong nung nisung asüba, Kerala nung Ockhi cyclone, Mexico aser Iran-Iraq arrtsülen menoknok lendong atalokba aser alima tesem balala nung kiralongrartemi amakba indang metetdaktsü.