Lok Sabha nung Congress lenir asütsü melunga lir: Shashi Tharoor

New Delhi, May 28 (Agencies): Congress lenir, Shashi Tharoor-i, pa dang Lok Sabha nung Congress lenir asütsü atema asüngdangra pai agizüktsü, ta metetdaktsü.
TV sentong ka nung jembidang Thiruvananthapuram Lok Sabha menden nungi tang agi asemben tashi takok angusang, Tharoor-i, “Kü dang Lok Sabha nung Congress lenir asütsü atema asüngdangra ni melunga lir,” ta metetdaktsü.
Lok Sabha election atema Congress tongti tenangzükba `NYAY` scheme ya nüburtem nung junga mangatetdaktsü, ta paisa ashi.
Congress Tir, Rahul Gandhi-i sodi meshiba dak sendakba nung tasüngdangba ka langzüdang Tharoor-i, Rahul-i maneni Congress Tir inyaktsüla, ta ashi.
“Pa metangita yaritsü atema party-i regional working presidents aika shimtsüla,” ta taoba mapang Union Minister, Tharoor-isa ashi.
India ya kin, sobaliba aser tamangba yimsü balala litetba secular linük ka, saka iba tangatetba madak Hindu linük, Hindutva tuluba kümogo, anungji Congress aser tanga opposition party temi ibaji anema nokdaktsüla, ta pai ashi.
Tharoor ya taoba mapang UN Under-Secretary General inyaka liasü, aser 2009 küm nungi tang tashi pa Thiruvananthapuram nungi MP lir. 2014 küm pai vote tali 15,000 agi BJP lenir, O. Rajagopal madak takok angu. Taküm Lok Sabha election nung pai vote tali 99,989 agi BJP candidate, Kummanam Rajasekharan madak takok angu.