Lok Sabha nung Consumer Protection Bill agizükogo

New Delhi, Luchii/December 20 (Agencies): Consumer tem temeden tashi itshitsü aser goods den services nung metokmeperi balala atema complain agutsütsü asoshi bill ka tanü Lok Sabha nung agizükogo.
Consumer Protection Bill 2018 ya ajanga Consumer Protection Act, 1986 melentsü. Maneni iba bill ya Rajya Sabha nunga agizüktsüsa akumtsü.
Iba bill nung o lemtepba mapang nung telangzüba agütsüsang Consumer affairs minister, Ram Vilas Paswan-i, tesüiba küm 30 tashi iba ozüng meyanglushii aruogo, anungji consumer tem temeden tashi itshitsü atema yanglushitsü nüngdaka liasü, ta metetdaktsü.
Lok Sabha nung Tamil Nadu züngsemtemi Cauvery onük, aser Congress züngsemtemi Rafale deal ken o joint parliamentary committee ka nem bushisüngdangdaktsütsü atema takhangba tagutsüdak nung iba bill agizüka liasü.
Iba bill nungsa Consumer Disputes Redressal Commission tentettsü aser District, State den National level nung forum tentettsü densema lir.
BJD nungi Tathagata Satpathy-i, iba bill ajanga bureaucracy nem tashi tali agutsür anungji iba bill yanglushitsü atema Parliament-i arutsü asoshi inyakyim ka latettsüla ta ashi. Paisa, iba bill nung ozüng karbo federal inyakyim anema lir, ta ashi.
Iba dak sendakba nung Pawan-i, iba bill nung item ama ozüngtemji mali, saka iba bill ajanga inyakyim tashi itshitsü aser consumer tem ajangzüktsü, ta ashi.
O lemtepba nung NCP, TMC aser JDU züngsemtemia shilem agia liasü.