Lok Sabha nung HIV/AIDS Bill agizükogo

New Delhi, April 12 (Agencies): Mongolbarnü Lok Sabha nung Human Immunodeficiency Virus (HIV) & Acquired Immune Deficiency Syndrome (AIDS) (Prevention and Control) Bill, 2017 agizükogo, koba ajanga iba tashidak alirtem indang temetentem kümzüka ayutsü.
HIV/AIDS Bill ajanga HIV aser AIDS tashidak alirtem atema temeten agutsüba den külemi kaket rejutem nung admission agitsü aser mapa angutsü atema parnok nem temeten agutsür.
HIV/AIDS Bill ajanga, HIV keter alirtem dang benshiba, mapa aser mapa inyakdak tesemtem nung parnok dang mesenmetui benshiba nokdanger, aser iba bill kübok ozüngtem nung aibelenertem nem temerenshi agutsütsü.
Iba bill dak sentakba nung Union Health Minister JP Nadda-i, HIV keta alirtem nem angati temang tendangtsütsü aser treatment agutsütsü atema kobi melii sorkari inyaktsü, ta ashi.
Iba bill kübok HIV aketertem indang kiojentem kümzüka ayutsü atema ozüng lir. Iba tetezü HIV keta arishi küm 18 ser tekübokpur shia kibong nung külemi alitsü aser kasa maongkatem agitettsü.
Iba bill ajanga nisung kati memelungi pa dak HIV tendangtsü, medical treatment agitsü mesüra research agitsü memelar. Iba tetezü iba tashidak tendangtsü aser anepalutsü atema pai/lai memelungi meinyaktsüla.
Iba dak alia, iba bill kübok tashidak keta alisang jagi memelungibo pa dak tashidak keta aliba osangji shingaia mesangdongtsüla.
Rajya Sabha nunga HIV/AIDS Bill ya taküm March 21 nü agizüka liasü.
2015 küm tatemlen tashi nung India nung HIV keta alir nisung million 2.1 shi liasü.
Ajisüaka Union Minister, Nadda-i, HIV menar tasen shilem 67 ajema kümogo (lakh 2.5 aliba nungi 85,000 ajema aluba) aser AIDS dak sendakba ajanga asürtem shilem 54 ajema kümogo, ta ashi.
Alima nung Antiretroviral Theraphy (ART) programme agiba tanabuba jenjang nung India lir, ta shia Minister-i, yaküm küm kija nunga ART nung sorkari sen crore 2000 intokogo aser linük nung HIV testing centres 22,000 kübok HIV test crore 2.9 agi, aser iba nungji mashisa tetsür crore 1.3 densema lir, ta metetdaktsü.