Lok Sabha nung rongrong adokaka bill ana agizükogo

New Delhi, Metsüremi 15 (Agencies): Tanü agi anogo 9 nü buba Lok Sabha senden nung rongrong adokaka tanübo bill ana agizükogo.
Lok Sabha senden nung opposition party balala nungi züngsemtemi Speaker sabangleni oa onük balala nung yimyim ayima longkak aita liasü.
Senden nung Minister of State for Labour, Santosh Kumar Gangwar-i Payment of Gratuity (Amendment) Bill, 2017 benok, iba sülen voice vote ajanga iba bill ji agizüka liasü.
Iba sülen sorkari Specific Relief (Amendment) Bill, 2017 benok, aser ibajia voice vote ajangasa agizüka liasü.
Meghwal-i payment of gratuity bill benokba mapang nung Speaker, Sumitra Mahajan-i, iba bill nung o lemteptsüla, ajisüaka iba bill ji agizüktsü kanga tongtibang, ta ashi.
Speaker-i, “Iba bill nung o lemteptsü nüngdak, ta nia melunger. Ajisüaka iba bill ya kanga tongtibang, anungji agizüktsüla,” ta ashi.
Revolutionary Socialist Party züngsem, N K Premachandran aser Congress Party nungi, Adhir Ranjan Chowdhury nati iba bill nung amendment kar atema benok, ajisüaka sorkari yamaji dang agizük.
Payment of Gratuity Act, 1972 ajanga mapa inyaker nisung 10 dak tema aliba establishments, factory, mine, oilfield, plantation, port, railways, company tem nung mapa inyakertem nem payment of gratuity agutsütsü temelaba agutsür.
Mapa inyakertem tajemba agi küm pongu inyaka lira parnok mapa nungi anendang gratuity angutsü temsüa lir.
1961 Act nung maximum maternity leave ji hopta 12 dang liasü ajisüaka Maternity Benefit (Amendment) Act, 2017 ajanga hopta 26 kümtsüogo.
Iba Act kübok maximum amount of gratuity ji sen lakh 10 dak tema masütsüla. Iba bill ajanga tang aliba ceiling agiener.
Relief Amendment Bill kübok state sorkar temi civil courts karbo Special Courts ta designate asutsü, aser ibaji High Court ka nung nung Chief Justice den angatetepa inyaktsüla.
Item ama courts-i infrastructure projects dak sendakba ken otem angadangtsü aser item ama ken otemji ita 12 tsüngdasa tembanga jembitsüla. Court-i iba mapangji ano ita trok atsülangtsü koka lir.
Tanü senden nung Congress, Trinamool Congress, Telugu Desam Party, YSR Congress aser Telangana Rashtra Samithi nungi züngsemtem Speaker sabang anasai arua yimyim ayima longkak aitaka bill anaji agizüka liasü.
Lok Sabha nung bank dak sendakba ochimashi, PNB ochimashi, Andhra Pradesh atema special economic status aser Cauvery tzü onüktem nung anogo aika longkak aita aruba ajanga senden junga magiteter.