Lok Sabha senden mezüngnü Dave, Vinod Khanna nunger bilemtet

New Delhi, July 17 (Agencies): Hombarnü Lok Sabha nung züngsemtemi Vinod Khanna aser Union minister Anil Dave na densema MP teinyakdak mapang asürtem bilemteta akhüm agütsü.
Tzüngluruwa mongpu Parliament senden mezüngnü Lok Sabha nung züngsem tasen ana, National Conference lenir, Farooq Abdullah aser Indian Union Muslim League lenir, P K Kunhalikutty na tenangzükba agia liasü.
Farooq-i Srinagar menden by election nung takok angu, aser Kunhalikutty-i Malappuram constituency nungi takok ngua liasü. Abdullah-i Kashmiri oshi nung aser Kunhalikutty-i English oshi nung tenangzükba agi.
Film actor nungi yimtenren nung ajemoksang, Vinod Khanna ya Gurdaspur nungi Lok Sabha züngsem liasü, aser taküm April nung pa arishi küm 70 lia alima nungi pila. Ano arishi küm 60 Dave ya Environment & Forest Union Minister teinyakdak lia taküm May ita nung alima nungi pila.
Asürtem bilemtetba mapang nungsa Lok Sabha Speaker, Sumitra Mahajan-i tawa Kashmir nung kiralongrartemi Amarnath tamang aieni aoertem tepsetba aija liasü.
Tanep senden metenzükdang Ato kilonser, Narendra Modi, external affairs minister Sushma Swaraj aser Parliamentary Affairs minister, Ananth Kumar nungeri Sonia Gandhi, Mulayam Singh Yadav aser Farooq nunger densema opposition lenirtem ajurua jembia liasü.