Lok Sabha senden tembangogo; senden nung bill 12 agizük

New Delhi, January 05 (Agencies): Hokolbarnü asükwa mongpu Lok Sabha senden tembangogo, aser iba senden nung ‘triple talaq’ densema bill 12 agizüka liasü.
Senden tembanga Lok Sabha Speaker, Sumitra Mahajan-i, December 15 nü senden tenzük aser iba mapang nung ghonda 61 ser minute 48 tsüngda senden 13 amen; iba dak alia senden nung rongrong adokba ajanga ghonda 15 amajok nung mapang laluogo, ta metetdaktsü.
Item bill tem rongnung tongtibang bill temji; central road fund (amendment) bill, requisitioning & acquisition of immovable property bill, national capital territory of Delhi laws (special provisions) second (amendment) bill aser goods & services tax (compensation to states) amendment bill liasü.
Senden nungsa high court aser Supreme Court judges itasen tutsütsü atema agizük.
Speaker-i, tan mongpu senden nung sorkari bill ajak agi 16 benoka liasü, ta metetdaktsü.
Tanü senden nung Ato kilonser, Narendra Modi-a densema liasü.
Laisa, “Iba senden nung rongrong adokba aser senden thinentsüsa akumba ajanga ghonda 14 ser minute 51 amajok nung lalu. Senden nung tongtibang onüktem nung o lemtepba ajanga senden menoa amenbaji ghonda 8 ser minute 10 liasü,” ta lai ashi.
Senden nung tasüngdangba 280 liasü, aser item rongnungi tasüngdangba 45 bo tebang agi dang langzü, ta laisa ashi.
Züngsemtemi public dak sendakba tasüngdangba 198 asüngdang, aser menoa senden amendang rule 377 kübok züngsemtemi tasüngdangba 226 asüngdang, ta laisa ashi.
Senden nungsa Standing committee balala report 41 agüja liasü.
Rule 193 nung ajemdaker Lok Sabha senden nung linük tesem balala nung alima tzü-mopung lendong balala atalokba atema o lemtepa liasü, iba mapang nung talisa cyclone Ockhi ajanga South India kongshiba atema jembi.
Senden nung minister temi paper 2255 benok aser Private Members’ bills 98 benoka liasü, ta laisa metetdaktsü.