Lokayukta aser Upalokayukta atema advertise asütsüla: ACAUT

Dimapur, Yimpoksüi (November) 2 (TYO): State sorkartemi Lokayukta aser Lokpal bill atsülangtsü atema mapa inyaker ta BJP lennir aser lawyer, Ashwini Upadhyay-i PIL benokba nung shitak shia lir. Supreme Court-i state sorkartem dang ita asem tsüngda Lokayukta ACT yanglutsü atema tetuyuba agütsüba atema ACAUT Nagaland-i tenüngsang agütsür.
Mizoram nung November 28, 2018 nü State Assembly election agitsü liaka, December 15 tashi nung Lokayukta mapa tenzüktsü ta nangzükogo.
Nagaland sorkari Supreme Court dang ita asem tsüngda Lokayukta shimtsü nangzükogo ta osangkakettem ajanga angazüker. Anungji, Nagaland sorkari Lokayukta aser Upalokayukta atema English national news papers 5 tashi nungbosa advertise agütsütsüla aser teinyaknür tenüngtem meshitsüla, ta ACAUT-i ashi.
Nagaland Lokayukta Act, 2017 nung arrla 4 nung aliba ama züngsem asemi akümba luden ka shimtsüla aser parnoki tenüng agütsürtem rongnungi shimtettsüla. Nagaland Lokayukta Act 2017 telatetbatem nung Nagaland nungibo nisung shinga Lokayukta mesüra Upalokayukta züngsem akümtsüsa shia mali, anungji Lokayukta aser Upalokayukta atema tangsa English leading National news papers 5 nung advertisement agütsütsüla ta ACAUT-i metetdaktsü.