Lokayukta Bill 2015 mapang agitsü

Kohima, May 27: Bilema aliba ama “Nagaland Lokayukta Bill, 2015” atema Select Committee-i parnok nem ano ita trok agütsüsemang ta mapang meshilokogo.
Honibarnü 12 buba Nagaland Legislative Assembly (NLA) nung 16 buba Special Session alidang Committee Chairman aser Parliamentary Secretary, Er Levi Rengma-i, “Nagaland Lokayukta Bill, 2015 indang Select Committee indang kümsük nung ano ita trok agütsüsemang” ta ashi. Paisa, ita trok tsüngda report agütsütsü ta shisem.
Committee-i mapang talila meshilokba tan agi joko asembenbuba asütsü. July 2016 nung Assembly session aser ano November 22, 2016 nü session nung parnoki ita trokrok meshiloka liasü.
Lokayukta ya state maparen nung ochimashi anema ketdangsütsü indang lir. Lokayukta-i ochimashi aser sorkar mapa inyakertemi mapa shitak meinyakba ken o tem bushisüngdangtsü aser public indang khurettem reprangtsü atema lir.
India kübok state balala nung Lokayukta tenteta lir. Ajisüaka, Nagaland nungbo iba Bill ya kanga karabo magizüktettsü ama ajiteter.