Lokpal agizüker küm 4 jungogo saka tang tashi Lokpal meshim: Rahul

New Delhi, January 05 (Agencies): Hokolbarnü Congress Tir, Rahul Gandhi-i Centre nung Narendra Modi-i aniba sorkari Lokpal meshimba atema aitsü.
Rahul Gandhi-i 2013 küm December ita nung Ato kilonseri tweet asüba ka lemsatep aser pa dang, kodang yazü nangzükbatem anentsü, ta asüngdang.
Rahul-i, Lokpal agizüker küm pezü jungogo, ajisüaka tang tashi Centre sorkari Lokpal meshim, ta aitsü.
Lokpal aser Lokayuktas Act ya 2013 küm agizüka liasü, iba sülen 2016 küm iba Act yanglushia liasü.
2011 küm October ita nung Anna Hazare-i linük nung ochimashi anema longkak ait, aser ibaji nübur aikati pusema liasü, iba sülen Modi sorkari Lokpal meshimba atema pai sorkar aitsü.
Lokpal chairperson aser züngsemtem shimtsü atema sorkar aser Parliament-i Lokpal aser Lokayuktas Act, 2013 amendment ka agizüktsüla. Iba atemaji sekection committee nung züngsem kaji Lok Sabha nung opposition lenir asütsüla, ajisüaka tang Lok Sabha nung opposition lenir mali.
Ajisüaka 2017 küm April ita nung Supreme Court-i, tang aliba ozüng kübok opposition lenir medenka selection committee-i lokpal aser züngsemtem shimtsü akok, ta metetdaktsü.