Lokpal indang Logo & Motto shimogo

New Delhi, November 26 (Agencies): Yimjak nung Lokpal atema logo aser motto indang tetoktepba ka agiba nung nisung 6,000 temai agütsüba nungi takoker shimogo, ta Mongulbarnü personnel ministry-i metetdaktsü.
Linük kübok tesem balala nungi logo agütsür 2,236 aser motto agütsür 4,705 liasü.
Logo indang design ji tagütsürtem nungi shimtet saka motto (slogan) agütsüba nungi ka danga meshimtet aser iba jagi Lokpal-i dang ka yanglu, ta personnel ministry-i ashi.
Uttar Pradesh kübok Allahabad nungi Prashant Mishra-i design asüba logo Lokpal indang logo amshitsü shimtet, ta parnokisa ashi.
“Iba logo ji Lokpal indang tetezü lir. “Lok” tetezü nüburtem aser “pal” tetezü anepalur” ta Mishra-i ashi.
Lokpal-i linük nung nüburtem kümzükba aser anepaluba indang iba logo ajanga sayur, ta paisa ashi.
Logo nung obendangertem, nisung, mita anükba, ozüng tem inoksema lir.
“Ni graphic designer ka kümnüa liasü saka koda masüba kar ajanga mekümtet. Ni design asüba Lokpal logo amshitsü shimba atema pelar. Iba ya ni atema takok tulu ka lir” ta Mishra-isa shisem.
Külen, Lokpal indang motto/slogan atema October 17, 2019 nü Lokpal indang full bench senden ka mena olemtep aser parnoki “Ishabasoupanishad” (religious book) indang tekong ka amhitsü lemtet.
Lokpal indang motto ji Sanskrit oshi nung lir aser ibaji “tangar rongsen aginüa tenük teyok” ta asüba lir.
Lokpal indang logo aser motto ya June 13, 2019 tashi nung agütsütsü sangdonga liasü. Iba nung takoker nem Rs. 25,000 senpet agütsütsü ta ashi.
Taküm March 23 nü President Ram Nath Kovind-i Lokpal nung chairperson inyaktsü atema Justice Pinaki Chandra Ghose nem tezüngzüktep agidaktsü.
Iba sülen Justice Ghose-i Lokpal nung züngsem 8 nem tezüngzüktep agidaktsü.