Lokti asem senden akatsü asoshi IPFT puri akhang

Agartala, Aug 23 : Bodhbarnü Khumlung nung 9buba Tipraland Statehood Demand Day-2017 anniversary amongba mapang  Indigenous Peoples Front of Tripura(IPFT) pusemertemi Agartala tezülen rally ayongzüka akaba noksa nung angur.

Agartala, August 23 (Agencies): Bodhbarnü state ajunga nung Tipraland balaka akhangba anogomung nung Indigenous People’s Front of Tripura (IPFT) puri state balaka atema parnok takhangba nung maneni akang akanga nokdaktsü asoshi telemtetba agiogo. IPTF puri Tripura Tribal Areas Autonomous District Council nungi Tipraland balaka kümtettsü asoshi khanga arudar.
Parnoki ano IPTF, Tripura sorkar aser India sorkar ta senden ka amentsü asoshi takhangba mataloktsü tashi animesüngzüktsü, ta metetdaktsüogo.
Iba telemtetba ya Bodhbarnü Tipraland takhangba anogomung nüngtem nung Khumulwung nung rally ka akaba mapang agia liasü.
Iba rally nung IPFT nung inyaker aser pusemertem parnok 20,000 dak tema adenshia shilem agi. “Onok küm aika Tipraland ka kümtettsü asoshi inyaka arudar. Tanü ya Tipraland akhangba anogo lir aser onoki maneni state balaka atema akhangba, iba ken o dak sendaka aliba lokti asem senden ka kaa telemtetba tajung ka magi tashi nokdaktsü,” ta IPFT tekolakba NC Debbarma-i ashi.
Taoba ita parnoki Tipraland balaka akhangba nenshitsü atema National Highway-8 aser train lenmang anogo ter tashi mokdanga liasü.
Governor-i Centre sorkar dang iba dak sendaka aliba lokti asem senden ka akatsü asoshi mepishitsü tenangzükba agütsüba sülen parnoki lenmang mokdanga ayuba sentong agin. Iba teloki parnok takhangba 2009 küm NC Debbarma lenüsiba kübok tenzük.