Lokti atema tajangzük agütsür kaka asütsüla: KG Kenye

Kiitsapo, Aenjeti 17 (TYO): Nagaland nungi Rajya Sabha MP, KG Kenye-i kaketshirtem dang, tajung kümer lokti atema tajangzük agütsür kaka akumtsü ayongzük.
Chakhesang Students’ Union (CSU) 70buba mongdang den külemi Kiitsapo Students’ Union (KSU) küm 50 ajungba benjungmong Phek District kübok Kutsapo nung alidang Kenye-i, asenoki meyipa reprangshitsüla aser asen libaliro, sobaliba aser Tsüngremi agütsüba sempettem asadangtsüla, ta ashi.
“International nüburtem atema mapa tajung inyaktsü atema asenok dak yimyatsüya tajung lir. Naga nungeri alima dang küm aika indang asen sobaliba aser yimya tajungtem sayutettsü, iba den külemi kiyongertem aser alima tesem balala danga sayutettsü,” ta paisa ashi.
Technology ainba dak sendakba nung pai, khenkhenbo asenoki tangar ajizüktsü kanga kerar, ajisüaka asenoki modernity, westernization, civilization aser advancement nung tajung-majung mebendanger, ta ashi.
Iba dak sendakba nung pai, kanga kümdanga alitsüla aser tajung-tamajung bendangteta alitsüla, ta ayongzük.
Kasa sentong nung Rtd director Art & Culture, Nagaland, Vevo Sapu-i, “Asenoki asenok atema nüma atangtsüla. Naga nunger sobaliba ya kanga tebor junga yangertet aser sentsü temeyoktep aika ajanga linük nung tanga tesem dang nungi asenok maitsü ya khenyongi balaka,” ta ashi.
Paisa, “Tsüngremi Pa sentsüwangshi atema nüburtem nem sempet balala agütsü. Nenok ken aser tsüngsang ajanga temeim aser tesünep osang proka asen nüburtem taginüba lemsatepang,” ta paisa ayongzük.
Kasa sentong nung Chakhesang Public Organization (CPO) president Kekhwengulo Lea-ia tayongzükba o jembi aser Naga Students’ Federation (NSF) president Kesosul Christopher Ltu-i salem osang aben.
CSU president Dode Nakro-i Tir onük jembi, LOC co-convenor Vevoyi D. Vadeo leniba nung iba sentong agi aser LOC convenor Mutsikhoyo Yhobu-i lokti pelaa agizükba o jembia liasü.