Lokti-i nisung tepsetba ken o nung BJP lenir densema apu

Ramgarh (Jharkhand), June 02 (Agencies): Tawa Jharkhand, Ramgarh district nung shi shishilembar ka loktii tepsetba ken o nung BJP lenir ka densema nisung ana puogo, aser nisung katibo pasasa court matsüngdangi aru, ta police-i metetdaktsü.
Iba ken o nung local BJP lir, Nityanand Mahato aser Santosh Singh na apu aser Chhotu Rana bo pasasa Ramgarh court matsüngdangi aru, ta Superintendent of Police, Kishore Kaushal-i metetdaktsü.
Brihostibarnü Hazaribagh district kübok Manua yimdak alir arishi küm 40 shi shishilembar kati pa meyong gari nung shi bena lir ta pa dak melung melemi lokti kati tepset aser pa gariji rongdokja liasü. Ibaji Ramgarh jila kübok Bazaartand nung atalok.
Iba sülen Hokolbarnü district administration-i security sepai tali yokba den külemi curfew ozüng benoka liasü.
Tangbo Ramgarh jila nung tensa süngjemogo, saka tesem 33 tashi nung sepai yoka lir.
Giridih district nung nisung kati nashishi bena lir ta melung melemi lokti kati pa dak mejungi azükba sülen anogo ananü tsüngda Ramgarh nunga iba ya ataloka liasü.