Lokti ka aintsü atema shisaliok tamendakdak tajung nüngdaker

May 15, 2019 nü Capital Convention Centre Kohima nung Chief Secretary, Temjen Toy den Principal Secretary Menukhol John aser State Mission Director Samagra Shiksha, Kevileno Angami nungertem agiba noksa ka angur.

Kohima, May 15 (TYO): Loktiliba ka atema tamendakdak takang nüngdaker aser ibaji shisaliok tajung sayuba ajanga dang akoktsü ta tanü Nagaland Chief Secretary, Temjen Toy-i ashi.
Bodbarnü Capital Convention Centre nung ‘Community Mobilization and Training’ nung o jembidang Temjen Toy-i ashiba agi “shisaliok ya tamendakdak tajungtiba lir aser lokti ka tejakleni aotsü atema iba ya kanga tongtipang lir. Tesayurtemi dang shisaliok tajung sayutettsü.”
Sorkar school tesayurtemi ‘missionary’ tangatetba nung mapa inyaktsüla aser ibaji ajanga nenoki tarutsü tajung ka atema tamendakdak takang ka yanglutsütsü. Tesayur ka ama nenoki tensa-mapangi aginüba ama tali angazüktsüla, ta pai ayongzük.
Tanü sentong nung Chief Secretary-i School Management Committee, School Management aser Development Committees teinyaktsütem indang video ka sayatsü. Iba video ji Department of School Education-i yangluba lir.
Principal Secretary School Education and SECRT, Menukhol John-i okila jembidang taküm HSLC tatidang nung sorkar school temi yaküm dang nungi taküm takok tajungba anguba atema pelaba metetdaktsü.
Higher secondary jenjang nunga sorkar school temi takok tajung ngutetogo aser talisa commerce stream nung sorkar school temi nija school tem dang nungi tajungba ngutet, ta Menukhol John-i ashi.
India sorkari ‘performance grading index’ nung ajemdaker state shia jenjang asadanger. Samagra Shiksha tasen kümshiba aser School Education Department indang inyaksangshi melenshiba ajanga shisaliok wadang balaka akümtsü, ta paisa ashi.
Iba atema taruba ita school ajak nung mobile app ka sayatsü aser ibaji ajanga school tem indang osang Union Ministry of Human Resource Development dangi yoktsü, ta Menukhol-isa shisem.
Iba mobile app ajanga elementary, secondary aser higher secondary level nung inyakba mapatem indang osang metettsü. District shia inyakba osang jangjatsü atema ajaki mobile app amshitsü ayongzüker. Maneni department inyaksangshiba jenjang tajungba akümtsü atema tesayurtemi tali awaloka oa inyaktsü ajungshir, ta paisa metetdaktsü.
School Education Director, Wonthungo Tsopoe-ia o jembidang “school ka ajanga lokti tejakleni aoba sayur” ta ashi.
Nagaland nung nübortemi asadanga reprangba department ji education department dang lir. Anungji nisung ajaki tebilemtsü bena, kanga dang nendaka mapa inyaktsüla, ta paisa ashi.
Nagaland nung shisaliok jenjang tajungba kümdaktsütsü atema tsüraburtem, village education boards aser sendaktepa alirtem ajaki posema nungittsü ayongzüker, ta Wonthungo Tsopoe-isa metetdaktsü.
Technical session agidang Joint Mission Director RMSA Nagaland, Dr Kevizakie Rio-i ‘roles and responsibilities of SMC/SMDC’ aser Nuchiyi Lohe-i ‘account maintenance, record keeping and Shagunotsav’ onüktem jembi.
Maneni, technical session nungsa UDISE & ICT, Right to Education and Rashtriya Avishkar Abhiyan, Shaala Sidhi, inclusive education for elementary and secondary, Mid Day Meal, Learning Outcomes onüktem benoka lemsatep.