Lokti kiyim

Asenok sobaliba tajungtem rongnung kaji aiür asangur kibong aküm meshirbo joko tsüraburtem den asüngdangtepa kibong akümba yimya ya ka asütsü. Kin kar sobaliba nungbo aiür asangur kibong akümtsü asoshi tsüraburtem kidang nungi aniteper jena aor aser iba sülenang meyipa arur  kibong küma alir. Ibaji tai masü par sobaliba. Ano, kin karbo aiürla o asangursang na kinüngtsü aser kinüngbo küma kibong makümdang tendanga ken külemi lidanger külenang kibong akümer. Ibajia parnok asoshibo tai masü, aji par sobaliba. Ajisüaka, asenok sobaliba nungbo akhidang nungi tsüraburtem den angatettepa kiyir benjong ayongzüka agir külenang kiyim ki mesemteta alir. Ano, asenok asoshibo tanü Khristan yimya nung kibong akümba yasa tajungba, kechiyong iba kiyimba yimya nungbo tenla kidang nübortem matsüngdang Tsüngrem tenüng tenangzüktepba agir külenang Tsüngrem nisungi moaja sarasademtsür aser kiyir benjong ayongzüka pei akok tajungtiba agi chiyongdaktsür. Atangji, aiür ka aser asangur ka peisasa taküm azüoka lir arur temeshi kiyimba benjong ayongzüka alitsübaji tasak. Iba atemaji peisasa pei shi azü azüoka atatsü nüngdaker aser ano tenla kidang temeshi kiyimba kuli agitsübajibo yutsür ano kiyir benjong ayongzüka chiyongdaktsütsübaji  mapa temela masü. Ajisüka, tepelatsü kaji tanü putu nung item mapa tasak ajakji kokteta kibong akümer aiür asangur aika lir. Ibayongji, talisa tsüngküm mapangbo nisung ajak kiyir benjongi orr mouma tajaba osang arur. Ano, yimti tulu nungbo kenüyongi tesem balala nung kibong ana asem kibong akümer, anungji mapang agi meperir. Aji oda, küm nung kiyir benjong nung dena senzüdang nübo endokba züngdangra kibong shia aiyiyi (aika) adoktsü. Ano, nübo atsükbaji dang masü saka tanü asüng kibong akümba ya takar makar ta mali takaba tokteper amai senotsü aiyiyila (onsara aika) endoka tenla kidang ki naro enoker aser benjong chiyongtsü renemer. Ibayongji, kibong tasen aika sentsüh nung tenzüker. Tanü tensa asenoki sobaliba tajung aser temoatsü agi tebilemtsü kümdaktsüba mapatemji item ya asütsü. Atangji, akhidang ama lanurtemi tsüraburtem nem khuret magütsüi kibong akümtsü asoshi meranga inyaktsüla. Ajisüaka, asenok ajaki bilemdanga tanü asenok kiyimba aser kiyir benjong aliba sobaliba nung ya temelenshi tajung ka bener marutetra rongsenren nung kibong tasen akümertem dang masü saka tadenertem dena kanga takoksa ajuruyonga aotsü. Iba timtem reprangteta küm ishika jakdang Dimapur nung Dimapur Ao Baptist Arogoi lokti kiyim alitsü sentong ka tenzük. Lokti kiyim tetezü kibong aika külemi tenla kidang kiyimba kuli agiba ta angatetdi. Iba sentong nung tenla kidang ki naro arogoi dang enoktsü aser kiyimba kulizüng agiba sentep temer külen tenla kima arogoi tarur ajak nem süngo jemdaktsü, anungji kiyir benjongi arurtem aika kibong shia anogo kaka endoktsü melen kenü nung temdok aser kibong akümertema sentsüh matsüh. DABAi tenzükba lokti kiyim inyakyim ya kanga junger liasü aser kibong aika iba temoatsü agiogo. Ajisüaka, oda oda, lokti kiyimertem kari tenla kidang kulizüng sentep agir külena ano oagi pei kidang kiyir benjong chiyongtsü renema tenzük. Ibaji arogo sentong anema liasü saka arogoi aji menokdangtet, anungji tangbo lokti kiyim alitsüba nükjidong to metongtetter. Ajisüaka, ano lokti kiyim aliba sobaliba ya alitsüla ta aika bang nungi jembiba angashir. Iba tebilembaji jepzüka tawa Dimapur nung Ao Senso Telongjem Dimapur purtemi Arogo aser lokti lenirtem den shisalemsatepba sentong ka ayongzüka liogo. Ajaki amato lokti kiyimba maparen ya junger ta ashir saka ano aikati tenla kidang külemi kulizüng agitsüba dak alaka pei pei mulungba tesem nung kiyir benjong ayongzüka akatsübo melatsüla ta ashir. Ibajia bilemdangtsü tim.  Atangji, tenla kidang lokti kiyimji lira ki naro arogoi enoktsü.  Ibaji junger ta bilemra, joko arogoi , pei arogo sasep yari, kiyimba sentong agitsü asoshi anogo ishika dang shimtettsü aser item anogo ajakji lokti kiyimba sentong asütsü aser sentep temer pei mulungba tesem nung kiyir benjong akatsübo melatsü. Aji koma ?