Lokti mapa menentsüba

Tang Nagaland nung municipal aser town council election magidaktsütsü ta nübortemi nokdakba maparen nung yakanü Honibar nü Dimapur nung anepdang 6:00 akok nungi tenzüka ghonda 12 kanga takok ngua mokdangogo. Ano, tajung kaji government tsütsüa tashiyim amshia nübortem anema inyakba melii aremzüktepa inyakba ajanga tesem kecha nunga lendong timtem melii ghonda 12 mokdangba sentong temogo. Ibaji nübortem takok lir, anungji nübortemi timtem takoksa arema ola adokbaji government-ia angatsüla aser lenchii arutepa inyaktsüla. Ajisüaka, sentongbo takok angu aser nübortema kanga belem saka mokdangba sentong nung shilem agirtemi mokdangba mapang shirnokbo senzüdaktsütsüla aser shirnokbo mesenzüdaktsütsüla ta asüba purtem benteta memeteti benshiba ajanga alima aser nübortem ajungtsü atema inyaker telok tenüngbo menentsüogo. Joko, mokdangba maparen ya asenok asoshia tasen kabo masü kechiyong aiben government-i nübortem anema sentong yangludang longkak aittsüsa akümer aser tanemi ozüngi melaba yimya nung jembidangbo government-i tenaronga marepzür. Ibayongji, khenkhenbo lenmang nung tetsüng agia mesenzüdaktsüi nisungtem nokdanga mokdanger.Teti nunga mokdangba mapang nübortem asoshi kanga nüngdakba mapa inyakertembo senzütsü melar. Item rongnungji shiranger yarir doctor aser nursetem aser parnok amenba gari aser ambulance, sepaitem, administration aser osangbenertem alitsü. Itemjibo mokdangba mapangang tenüngdakba asür, ibayongji senzütsü melar. Ajisüaka, mokdangba mapang kari tera mekümdangdang item tongtipang nisungtem dena nokdanger mesüra o mashimashi jembia parnok mulung yirudaktsür. Atangji, medical nisung asüyonga mesüra osangbenertem asüyonga pei meyong identity card shitak abentsüla aser pei amenba gari soter idendity card asüngdangba atemabo mejashii sayutsüla. Ano, khenkhenbo mokdangba sentong nung shilem agir (volunteers) karibo yi jemer nokdaker, idangji shibaji shiba aser shiba den kechi jembitsüla, itemji mebendangteti mashimashi jembir aser mashimashi inyaker . Iba nisungba kija takümjibo tangari shiba-ar memetettsüa akok saka iba nisungba jagi inyakba mapajibo alimai metetter, iba jagi pei adenba lokti aser yimten tenüng menentsür. Nisung shiai metettsü tongtibang kaji, peisasa pei taküm azüoka aliba ajanga pei aliba lokti aser yimten topur jungdaktsür.  Ano, külen peisasa pei taküm mazüoktetba agi pei taküm dang masü saka maparen aika nung timtem agütsür aser lokti menentsür. Ibaji meteta, talisa, yimten aser lokti ka tenüng nung inyakdang kanga kümdanga inyaktsüla. Ano, talisa mokdangba mapang shiri shilem agidir agiaka, yi majemtsüla aser aya tzüra arema pei lima aser nübortem asoshi nokdaktsüla. Kechi onük aser maparen nung südir süaka mokdangba sentong nung shilem agibaji pei lima aser nübortem asoshi tenlar ta bilema kanga süokia ia inyaktsüla. Shiri ayongzükdir ayongzüaka, mokdangba sentong ya ayongzüknüseta ayongzüker masü saka mayongzüknüseti shisaboluseta alima aser nübortem tajangzük ngudaktsünüba agi ayongzüker. Iba kasa nükjidong aser tangatetba nung tanüa Nagaland tesem  aika nung municipal aser town council election magidaktsütsü asoshi mokdangdagi. Iba ama sentong nung akok tashi sensosanger ajaki shilem agitsüla saka lokti mapa aser tenüng menentsütsüsabo shingaia kecha meinyaktsüla aser mejembitsüla. Iba  amaji peisasa pei taküm azüoka inyakra mapa nunga takok angutsü aser lokti aser yimten tenünga atutsü.