Lokti nung tebendang ali tashi ‘quota’ alitsüla: Mohan Bhagwat

Pune, Jan. 28 (Agencies): Brihostibarnü RSS tongti, Mohan Bhagwat-i, loktiliba nung tebendang ali tashi linük nung ‘reservation policy’ ya alitsüla, ta ashi.

Pune nung Maharashtra Institute of Technology (MIT)-i ayongba ‘Students’ parliament’ sentong nung tasüngdangba ka langzüdang RSS tongti-i, “Loktiliba nung bendangshidang ali tashi ‘reservation’ alitsüla. Ajisüaka ibaji ochishia inyaktsüla,” ta ashi.

Bhagwat-isa, Linük Temzüng nung RSS-i ai-aura makaba kecha mali, ajisüaka sorkar mapa balala aser kaket rejutem nung admission atema reservation policy ji ochishia inyaktsüla, ta ashi.

Linük Temzüng nung teinyaktsü alibatemji kaketshirtemi benshitsüla, ta pai ashi.

Ayodhya nung Ram tekülem ki yanglutsüla, ta pai ashi.

Iba tekülem kiji yanglura sensakertem anogoshia chiyungtsü angutsü asü (?) ta asüngdangba langzüdang pai, “Parnok dangi roti/amtsük arur-a ma, tang tashi nungbo iba tekülem ki meyanglu,” ta ashi.

Linük nung akhümtsübutep maliba dak sentakba nung tasüngdangba ka langzüdang Bhagwat-i, “Akhümtsübutep aser tangar agizüktetbaji asen sobaliba nung lir. Pei atema dang bilemba tangatetbaji tai,” ta ashi.

Tamangba yimsü nung ajemdaker yimtenren inyakyim benokba tasüngdangba ka nung pai, “Iba tasüngdangba yabo yamaji inyakertem dang asüngdangtsüla. Iba tasüngdangba ya ni atema masü,” ta ashi.

Bhagwat-i ashiba agi, India Temzüngji sobaliba tanela lir, aser putu melenshiba apir ozüngtem yanglushitsüla.

Iba sentong nung ‘Culture & Constitution’ onük nung jembidang pai, linük nüjiso anguba mapang India ji pei linük masü ta bilemertemi linük tasen ka (Pakistan) akum, ta ashi.

“India nunger Temzüng ya ajaki agizükteter aser ajaki melungtepa agizük, saka Pakistan nunger Temzüngbo tamangba yimsü ka nung ajemdaker yanglu,” ta RSS lenirisa ashi.

“Pakistan nunger melungsentsü ajanga tangar agizüketba mesüra akhümtsübubaji magizüktettsü,” ta RSS tongti Bhagwat-isa shisem.