Lokti tentet aliba tajangzük

Tangbo town-len senzüdang jangotsü ayokdak nisung longsu-longsua nungtepa ngura, ibaji Fair Price Shop asütsü. Ano, Dimapur aser Kohima nung balaka gari totzü inokdaki odangra gari totzü tajung  enoktsütsü aser Government office nung tatidang magi inyaker shimtsü asoshi kanga atidaka kümogo. Item tajangzüktemji ACAUT teloki nübortem nem bener arutsüba tajangzüktem asütsü. Ibaji government nung Ruling aser Opposition party-temi nübortem asoshi inyaktsüba dang nungi noklangben agi tuluba aser tajungba asütsü. Atangji, tang Mokokchung nunga totzü ayokdak ka nung touzük tai agütsüba puteta bushisüngdang tenzükba jagi nübortem tajangzük angutsü. Aji oda, Mokokchung nunga nübortem asoshi bilemja inyaktsür lokti tentet aika liaka Ongpangkong Kaketshir Mongdangi iba ashikülak mapaji putetbaji nübortem asoshi temoatsü tuluka bentsür aruogo ta bilemer. Iba nung jagi tenzüka nübortem ashioktsüba mapatem ajak puteta anendaktsütsü merangtsübaji yimten aser lokti tentettem mapa asütsüla. Asenok Naga nungertem ya tamachi amato mapang talangka lia arur, kechiyong asenok nem seret tai ozüka agütsü nunga pelashishia bener aor, totzü nung kerosene meyokteper enoktsüyonga kecha jashia mali, totzü ayokdak meter meshitak yanglua yur matoksa enoktsüyonga kecha hau ta mali, ration card-bo lir saka jangotsü magütsüyonga ola madoktsü aser khen khen agütsü dang jang tamajung agütsüyonga seret nung sen asem agi angur asünungji tenük sünga dang bener aor. Anogo sen anogo noklang ka indang angutsü melen anogo ter nü sen agütsü nunga angati anguba sen ta bilema panüjisa tepelaba pelaa kidang amongtsü. Itemji jilushi air asünungbo mesüra film yanglur reprang nungbo kanga temenünütsüka aser tejashitsüka asütsü. Asenok meyong sen noklang ka nungi asenok nem sen ter danga agütsüra tepelashi . Naga nungertem aser ano talisa asenok Aortem iba tashiji kümer sensakertem kanga tesensakba -tesendakba kümdagi aser takartem takarba-takarba kümdagi. Anungji, iba tia aser tangatetba tamajung ya memelenshi nungbo küm ishika tsüngda Nagaland nung kin ana dang alitsü. Iba kin anaji kanga takar kin ka aser kanga sensaker kin ka ta asütsü. Aikati bilemtsü, Delhi nungi yokba senji Nagaland tonger shir agidir agiaka Naga nunger agir, tatidang magi sübokrem amshia mesüra tejak repranga government mapai airtemjia Naga nunger, jang senpak asem agi angubaji ak nem danga agütsütetra tajung, terenlok mapa atema sen arubaji mapa meinyak ser lema agiyonga kasa dang ta bilemtsü. Iba amaji bilema -bilema shitak kümer Nagaland nung joko government inyakyim kecha lateta mali mashimashi ka kümadokogo. Khen bilemtsübo mapa angurji Naga nunger dang süra ojang ta bilembaji shitak amai saka iba jagi tanü dang masü saka tarutsü Naga lima tia raksatsür asütsü. Tatishitsü agi, police constable mapa ka sen lakh ka agi alir ainung iba consatable jagi ozüng raksar anema tasü itta inyaktsü asü mesüra kechi bilema inyaktsü ? Tesayur mapa ka sen lakh ana agi alir ainung iba tesayur jagi tanurtem dang ochishia Tsüngrem tsübua alitsü sayutsü asü ? Tejak repranga tatidang magi nisung kar government mapa nung aniok nung item jagi mapa koka inyaktsü asü ? Aji oda, sübokrem amshia tulur menden angu nung item jagi tulur ama meraketa pei lima aser nübortem ochishia tenzüktettsü asü ? Iba ama ochimashi mapatem jagi Naga nunger lanurtem tajung meyirijang aika tezüdangdaktsüdagi. Ibaji Naga lima nung lendong agütsütsü bomb renemba mapa amato asütsü. Item lanurtem nemji asenoki mapa magütsütetra kazüa-kazüa parnoki tamajung inyaktsü bilemtettsü mesüra ain adoker yimten aser lokti anemtsü. Aji oda, angati anguba sen ajak pelashishia agizüka Tsüngrem temoatsü ama züngshibaji Tsüngrem atalar ta asenoki mangatet tashi, Pei boksüng mangu sensaker agi meketbanger alidak Supply jang alia ak nem agütsü tashi, gari totzü nung asenok ashioktsüyonga jashia ola madok tashi aser tai dang tai ta shiteta lokti tentet aser kija menokdaktet tashi asen lima aser nübortem akümketa menokdaktettsü.