Loktii nisung tepsetba onük nung SC-i state tem nem tetuyuba agutsü

New Delhi, Rongjui/September 24 (Agencies): Tanü Supreme Court (SC)-i states aser Union Territories ajak dang nashi kümzükba maparen aser loktii nisung tepsetba nokdangtsü atema tetuyubatem inyaktsüla, ta nenshia metetdaktsü.
SC-isa, item ama atalokra ozüng terasaba ajurutsü, ta tekümdangtsü metetdaktsü.
Supreme Court-isa, tang tashi Arunachal Pradesh aser Delhi na densema state 8-i Chiteni/July 17, 2018 nü tetuyuba agutsüba ama osang aguja mali, ta metetdaktsü.
Justices A M Khanwilkar aser D Y Chandrachud nati akumba SC bench-i, “Loktii nisung tepsetba aser pei kabu nung ozüng amshiba ajanga ozüng terasaba ajurutsü,” ta tekümdangtsü metetdaktsü
SC-isa UTs aser state 8 dang anogo asemnü tsüngda affidavits nung osang agutsütsü atema maongka agutsü, iba denji külemi Congress lenir, Tehseen Poonawala-i benokba temepishiba ken oji hopta ana sülen angadangtsü lemtet.
SC bench-isa Centre sorkar dang state ajak nung television, radio aser electronic & print media ajanga nisung tepsetba aser nashi kümzükba anema awareness agutsütsü atema tetuyuba agüjang ta nenshia metetdaktsü.
Tamalen Centre-i SC dang, SC tetuyuba nung ajemdaker loktii nisung tepsetba anema ozüng ka yanglutsü atema Group of Ministers ka tenteta parnok nem tashi agütsüogo, ta metetdakja liasü.
Taküm Chiteni 17, 2018 nü iba dak sendakba ken o angadangba mapang nung SC-i, loktii nisung tepsetba aser pei kabu nung ozüng amshibaji ajanga linük ozüngtem mamokbangdaktsütsü, ta oshidang agüja loktii nisung tepsetba aser nashi kümzükba maparen atema tetuyuba kar agüja liasü.
SC bench-isa state sorkartem dang, district shia nung tajemba agi Superintendent of Police rank nung police ketdangser ka nodal officer shima loktii nisung tepsetba tatalokbatem nokdangtsü atema inyakang, ta tetuyuba agüja lir. Item officers dang Special Task Force ka tenteta intelligence osang bendentsü aser item ama tatalokba nokdangtsü atema tetuyuba agutsü.