Loktiliba aser sobaliba wazüka ayutsüla: BP Acharya

Kohima, November 29 (TYO): Deobar nü Nagaland aser Assam Angh, P B Acharya-i, nüburtemi pei maitsü kümzüka ayutsü atema pei sobaliba, loktiliba aser oshi wazüka ayutsüla, ta ashi.
November 29 nü State Academy Hall, Kohima nung North Eastern Region Service Nepali Association (NERSNA) Silver Jubilee benjungmung nung tongti tesemdanger o jembidang Angh-i, “India ya secular, pluralistic aser democratic linük ka lir, anungji tamangba yimsü mashie tesünep nung amanga benshitsü nisung ajak dak temeten lir,” ta ashi.
Angh Acharya-isa, “Kin ajaki kin tentettem tebendang kecha makai pei oshitem jembitsü temeten lir aser pei oshi, sobaliba aser loktiliba wazüka ayutsüla, kechiyong ibaji pei maitsü,” ta ashi.
Angh-i Nepali nungertemi army aser para-military nung service balala agüja India security aser defense atema inyakba asoshi tenüngsang agütsü.
“Nepali nungerji tasütait atema shisanger aser parnok tasü aitba atema ni tenüngsang agütsür,” ta pai ashi.
Paisa, Nepali nungertem dang pei chirnur atema shisaliok tajung agütsütsü ajungshiba den külemi tanur tetsür aser tetsürtem nem kasa maongka agütsütsüla, ta ayongzüka liasü.
“Lokti ka tejakleni aotsü atema shisaliok nüngdak,” ta paisa ashi.
Tanü iba sentong nung tetushi tejaokerji Minister of social Welfare & Parliamentary Affairs, Kiyanilie Peseyie liasü aser pai-a NERSNA nem tenüngsang agüja iba Jubilee alizüng atongba atema Nepal nungertemi Tsüngrem nem tenüngsang agütsütsüla, ta ashi.
Tanep Angh-i sentong lapokja shimo milen tsükloktsüba sülen souvenir & memento sayatsüba den NERSNA tentettem nem tenüngsang agüja liasü.
Jubilee Organizing committee Convenor, Dilip Ghimire-i lokti pelaa agizük, Maniram Ale-i Tir o jembi, Dimapur Gorkha Union Mendenbuba, Kumar Subbha-i o tatsüka jembi aser Organizing committee züngsem Secy., Lalmani Bhusal-i tepela anküp o jembia liasü.