Loktiliba renloktsü atema Science & Technology kanga tongtipang

Kohima, Monupii (May) 5 (TYO): Science & technology ajanga meimchirtem renloker aser tejakleni aoer aser medical science & healthcare ajanga tongti shilem agir ta tanü Nagaland Governor P B Acharya-i ashi.
Oking Hospital & Research Clinic nung East Zone Urological Society of India indang Mid-Term Workshop nung jembidang Governor Acharya-i “Asen linük nung medical technology ji advanced linüktem den kasa lir” ta ashi.
Nisung ajaki healthcare angutsü atema asenoki meranga inyaktsüla. Tanü laparoscopy, endoscopy aser robots purapitetba ajanga shirangertem melamela anepaluteter, ta paisa shisem.
Acharya-isa doctor tem nem tenüngsang agüja jembidang, “Asenok taküm nung doctor temi yariba ya zübzüba meyutsütsüla. Parnoki asenok taküm kümzüktsü atema bendanga agüja inyaker” ta ashi.
Paisa, doctor tem dang teinyaktsü lateta alibatem sülen anidaktsü aser parnoki tashidak ka masü saka meimchir taküm ka anepalur ta bilema anepalutsü atema ayongzük.
Governor Acharya-i AYUSH (Ayurveda, Yoga and Naturopathy, Unani, Siddha and Homoeopathy) indang metetdaktsüdang, iba ya sorkari Ayurveda, Yoga, Naturopathy, Unani, siddha, Homeopathy, Sowa Rigpa aser tanga mozütem ajungkettsü aser bushitsü atema tentetba lir, ta ashi.
“India indang health care system- Ayurveda ya alima nung kanga nüngtugu lir aser asenoki health care system atema inyakba ya alimai pelaa agizüker. Asenoki mozü system balala agizüktsüla aser system temji akhümtsübutsüla, ta Acharya-isa shisem.
India nung nütsüng yongsük teimba ka yimtsüngtem nung alir aser tashidak balala melamela menateper. Asenoki iba khuret ya koktettsü atema mapa inyaktsüla, ta paisa ayongzük.
Iba sentong nung ESUZI President Dr K K Panigrahy aser Honorary Secretary Dr Harprit Singh natia o tatsütsü jembi aser parnoki Nagaland nung urologist yaritsü ta nangzük.
Workshop nungsa Laparoscopic Nephrectomy, Percutaneous Nephrolithotomy (PCNL) aser Micro-PCNL atema live operative sessions agi.