London amakba indang Bollywood Celebrities-i lemsateper

Mumbai, June 04 (Agencies): Kiralongrartemi London yimti anaben tashi amakba osang angashia aoksar ta shia Shruti Haasan, Neha Dhupia, Anubhav Sinha aser Salim Merchant nunger densema Bollywood celebrity aikati nüburtem dang longjema alitsü ayongzük.
June 3 nü kiralongrartemi London amakdang nisung tenet tepset aser nisung 48 yiruja liasü. Taküm March ita nungi tenzüka tang tashi nung kiralongrartemi UK asemben tashi maakogo.
Shruti Haasan-i twitter ajanga, “Tobur tajung London nung iba ya atalok ta ni mamangteter. Ni ajak atema sarasademtsür,” ta ashi.
Shekhar Kapur-i twitter ajanga, “Alima nung kiralongra anema tajungtiba agi meranga inyakaka UK maneni amaker, kiralongrartem nokdangtsü atema inyaktsüla. Alima nung kiralongra mapa nung aartsü mali. Iba ya tashidak ka lir aser taneptsü nüngdaker. Iba ya parnok kija tebilemtsü ka masü#LondonBrige,” ta ashi.
Rahul Dholakia-ia twitter ajanga, “Joko iba ya ‘breaking news’ ka masü saka ‘Heart Breaking News’ ka kümogo. London atema sarasademjang#UnitedWeStand” ta ashi.
Parineeti Chopra-i, “Alima aiben amakba ya mamangteter. Tesünep atema sarasademer,” ta ashi.
Neha Dhupia-i, “Ano kiralongrartemi maakogo. Ano tai maket nisungtem asüba anogo ka.. ano saaker, alima nung kechi ataloker ta asüngdangba anogo ka,” ta ashi.
Salim Merchant-i, “Tang Paris tongogo, aser London amakba osang angashia aoksar. Iba ya kodang ang tembangtsü?. Raraba osettem yangluba industry-i iba ya atalokdaktsür ta ni bilemer,” ta ashi.
Akshara Haasan-i, “Ano London nung kiralongra atalokogo. Iba ya tejashitsüka lir. Temelung malemtsüsa inyakba mapatem mita liang, aser kümzüka liang,” ta ashi.