London Bridge amakdang yirur alisang nem Triple H-i WWE belt agütsü

London, June 25 (Agencies): London Bridge lendong nung police tanishir ka pa mapa maliba mapang süaka pai nübur aika kümzükba mapa tajung ajiteta WWE Champion belt ka pa nem agütsü.
June 3, 2017 anogo London Bridge nung kiralongrar temi nisung ti tepsetba lendong nung Charlie Guenigault-i iba lendong nokdangtsü merangba mapang pa dak kotari agi atsüng.
Charlie dak kotari agi atsüngba zübu ya pa tetsüng, tekolak, teberem aser tebok nung lir. Britishi Transport Police tanishir ka kümzüktsü merangba mapang Charlie yirutsü.
WWE nung 14 ben World Champion bena alisang, Triple H-i Charlie nem tetushi agütsütsü asoshi pa aliba hotel bushia ao aser iba mapang Charlie kanga süngmanga aoksa.
WWE indang executive vice-president, Triple H-i iba belt ya Charlie nem amoktsü.
“Tebang agi rasa-a meshitetba tetsübutsü densa kati oa tangar yariba ya ‘Hero’ ka lir,” ta Triple H-i ashi.
“WWE nung shilem agirtem ya adangji nung superhero tem amai bilemba ajanga WWE ya ajir, ta nisung aikati ashir, saka Charlie ya shidakba hero lir,” ta Triple H-i ashi.
Charlie ya mozüki nungi aluogo aser pa temang junga kümogo.