London Bridge amaker rongnung tenüng tasembuba metetdaktsüogo

London, June 06 (Agencies): London yimti tiyongtsü nung nisung tepseta aser yirutsüba mapa inyakba mapang police temi khaseter rongnung tasembuba ya arishi küm 22 tain, Youssef Zaghba, ta jangjaogo. Aser Youssef ya ‘dual citizen’ (Italy aser Morocco) lir.
Iba lendong agütsür nisung asem rongnung nisung ana tenüng bo British police-i jangjar liasü aser tasembuba tenüng ya mesangdongi liasü.
Zaghba tetsü ya Bologna nungi aser tebu ya Morocco nungi lir, ta osang ka ajanga ashi.
“Iba nisungba jangjashitsü asoshi par tsürabur nem osang agütsüogo aser pa ya arishi küm 22 tain, Youssef Zaghba, east London nungi lir. Pa ya Italy nunger aser Morocco nungi aru. Pa ya police-a masü aser MI5-i tenük yoka aliba nisunga masü,” ta Metropolitan Police ajanga ashi.
Iba ken o nung temolung malemba nisung ka itangiter temi Barking nungi Mongulbar anepdang pua lir, ta police ajanga shisem.
London nung kiralongra mapa inyakba nung shilem agir nisung ana tenüng Metropolitan police ajanga Hombarnü metetdaktsü. Tena tenüng ya Khuram Butt aser Rachid Redouane lir aser Butt ya bo police temi meteta liasü saka pai iba lendong agütsütsü sentong yangluba ya melazüki liasü.
Butt ya arishi küm 27 tain aser pa ya British citizen saka Pakistan nung aso aser Redouane ya arishi küm 30 tain aser pa ya Morocco aser Libya nunger ta ashir, ta national counter-terrorism police nung tekolakba, Mark Rowley-i sangdong ka nung ashi.
Iba lendong agütsür nisung asemprong ya police temi minute ti tsüngta nung khaset.
Honibar aonung London Bridge anasa item nisungtem ya temang nung bomb taila inoker arua lendong agütsüba ya Britain nung ita asem majung tsüngta kiralongra mapa inyaba tasembuba liasü aser iba lendong ya general election agitsü anogo ka dang lia adalok. Item nisungtem yaki van ka nung mener lenmang nung senzüa aliba nisungtem dak menüng aser nisung kar dak kotari agi atsüng.
“Iba lendong agütsüba indang bushisüngdang ya kanga tekaraba nung inyaker aser kanga tepenja noksatem adongtena otsü bushitettagi. Tang tashi nung ketdangsertemi nisung 12 puogo – tetsür tenet aser tebur pongu – aser kiojen trok nung mita bushiogo (pezü Deobarnü aser ana tanü). Onoki apur rongnung tetsü ka aser tebur ka chiokogo,” ta police temi sangdongba nung shia lir.