London: Khan 1 buba Muslim Mayor akümer

London, May 07 (Agencies): Britain nung tentetba Labour Party (LP) yimtenren telok nungi candidate, Sadiq Khan-i Conservative telok nungi candidate, Zac Goldsmith madak takok ngua London indang mezüngbuba Muslim nunger Mayor kümogo.
London nung alirtemi par vote noklang nung shilem 45 agüja arishi küm 45 tain Khan par Mayor yashi, Hokolbar nü shima liasü.
Vote shilem 43 shi angusang, Goldsmith-i tan Mayor election nung tamakok anguba ajanga par Conservative teloki London madak küm 8 tashi yimsü asübaren anentsüa tia bener arutsür lir.
“Ni London indang Mayor menden abentsü maongka kodanga mangutsü ta ni bilema liasü. Ajisüaka, London nung alirtemi kü dak temulung lemteta ni Mayor shimba atema pelaba lemsateper,” ta Khan-ia mayor menden benokdang metetdaktsü.
“Ni aser ozü kibong nem agütsüba ama, London nung alir nisung shia nem maongka tajung agütsütsü nangzüker,” ta pai nangzüka liasü.
New York Mayor, Bill de Blasio aser Paris Mayor, Anne Hidalgo na densema, alima yimti balala nung Mayor menden abenertemia Khan den pelaba osang lemsatepogo.