London nung Anti-Corruption Summit amen

(Abelen nungi achijileni tarensena) World Bank Tir, Jim Yong Kim; Carnegie Endowment for International Peace nung Senior Associate, Sarah Chayes; US Secretary of State, John Kerry; Britain Ato Kilonser, David Cameron aser Nigeria Tir, Muhammadu Buhari nungeri London nung ayongba Anti-Corruption Summit nung shilem agiba noksa nung angur. (London, May 12)

London, May 12 (Agencies): Britain Ato Kilonser, David Cameron-i ayonger külen London yimti nung Anti-Corruption Summit senden tanü, Brehostibar nü amenba osang jangjaogo.
“Ochimashi inyakba temenen ya alima tesem ajunga tonga lir. Ochimashi inyaktepba ajanga alima tesem ajunga nung rongsenren jenjang mejungi akümba, nübur rong nung sensak tia ajuruba aser nübur o nübur na tsüngda tongpanga raratsüsa tensa mejungi kümdaktsüba osang bushiteta lir,” ta Cameron-i tanü senden tenzüktsüdang sangoktsü.
Ochimashi inyakbaren yimjak nung jungkai adoktsütsü aser aibelener nem tapet temerenshi agütsütsü lenmang aser tasa bushia ochimashi inyakbaren nokdangtsü nükjidong nung ayongba senden nung Cameron aser US Secretary of State, John Kerry na den külemi, Afghanistan, Colombia aser Nigeria nungi lenirtemi shilem agiba osang jangjaogo.
Tan senden nung shilem agirtemi terenlok angutsü tenzüka aliba linüktem nung ochimashi inyakbaren nokdangtsü aser terenlok ngua aliba linüktemia par mapatong ajunga ochishia inyaktsü ajungshitsütsü alizüng ayuba osanga jangjaogo.
Alima linük lenirtem aser tongtipang nisungtemi ozüngi melaba ama saru magütsüi pei rongsen bendanglen miima ayuba osang, Panama Papers yimjak nung adoktsüba sülen Cameron-i tan sendenji ayonger lir.
Ano külen, “Ochimashi inyakbaren ya alima ajungai ajurushiba tashidak tesashi ka lir. Kiralongrartemi lendong bener arutsüba ama, ochimashiba ajanga linük shia nem lendong tulu bener arutsür,” ta Kerry-ia tanü metetdaktsü.