London nung Sharif temulungjang operation takok ngua agiogo

London May 31 (Agencies) : London nung Mongulbarnü Pakistan Ato Kilonser Nawaz Sharif temulungjang operation kanga takok ngua agitetogo. Küm pongu tsüngda nung pa tan agi tanaben temulungjang operation agir asütsü, ta par kibong aser mozü kidang ketdangsertemi osang tejangja metetdaktsü.
“Tsüngrem Tulusang teyari ajanga operation kanga takok ngua agitetogo. Ato Kilonser joko tang ICU-i anir aotsü,” ta Sharif’er jala Maryam Nawaz-i twitter ajanga ashi.
Iba operation kecha timtem meli agitetogo, ta doctor temia metetdaktsü.
“Pa operation takdangi anir mai tsüngda ozü kibong sendena Quran zünger ang anir ai,” ta par jabaso Hussain Nawaz-i Geo News osangbenertem dang ashi.
Arishi küm 66 tain, Shariff ya temang tendaktsü atema tan hopta ang London-i anir ao aser yangji aliba doctor temi temulungjang operation agitsü ashi.
2011 küm temulungjang operation agiba ajanga iba timtem ya adok, ta jalai ashi.
Sharif-i India Ato Kilonser Narendra Modi dena London nungi phone ajanga jembiogo ta India External Affairs ministry nung otongdari ashi. Modi-i pa kara ajungtsü imlar ta ashi.
Doctor temi Sharif dang hopta ka anisüngzüktsü shiogo.