London nung tanur timba raksaa intoker

London, May 20 (Agencies) : England nung aliba yimti ajak dang nungi London nung tanur timba raksaa intoker, ta asadangba tasen ka agiba sülen nguteta lir.

London temeküt nung aliba Knowsley, Merseyside nung tanur timba raksaa intoker, ta Office for National Statistics (ONS)-i ajanga metetdaktsüogo.

Barking aser Dagenham tesemtem nung alir tetsür arishi küm 15 nungi 44 tsüngda purtem reprangdangra, tetsür 1,000 nungi 29-i tanur raksaa intoker aser ibaji ajanga iba tesem nung tanur raksaa intoker timba ta ngutetogo.

ONS-i ashiba agi, 2015 küm tanur raksaa intoker 185,824 liasü iba jakdang 2014 kümbo noklang nung shilem 0.7 agi timba liasü. Tesem kar nungbo tetsür kasai tanur aiben raksaba nguteta lir.

Tanür raksaa intokertemji arishi küm 20 nungi 24 tsüngda pur lir aser tetsür 1,000 nungi tetsür 53-i tanur raksaa intokba jangjaogo.

2015 sülen nungi England aser Wales nung arishi küm 30 nungi 34 tain purtem tanur raksaba timba kümogo, 2015 küm noklang nung shilem 14.5 liasü saka tang shilem 18 agi timba kümogo.

British Pregnancy Advisory Service nung chief executive Ann Furedi-i, “Tanur raksaa intoker rongnung tesadang kabo tanur tetsütem lir,” ta ashi.