London Tower lendong sülen arogotemi yariteper

London, June 18 (Agencies): London nung aliba Grenfell Tower nung kitsükkirong lendong atalokdang nisungtem kümzüktsü atema mapa inyakba ketdangsertem bilemtettsüla ta Christian Today nung ocet zülur Andy Walton-i ashi.
“Asenoki parnok dang pelar ta o agi ashiba dak alia yaritsüla” ta pai ashi.
Iba ama tejashi mapang ka nung nisungtemi arogotem dak tenük yoktsüla kechiyong parnoki teyari tapu balala agütsür, ta Walton-isa ashi.
St. Clement-i tejenokdak ka lapoktsü, Salvation Army-i emergency services nem chiyungtsü aser tajemtsütem agütsür, local arogotem nungi tenla agütsür, St. John’s, Notting Hill-i yipden aser chiyungtsütem agütsüba den tanurtem kazüdak tesem ka yanglutsü, ta paisa metetdaktsü.
“Osettsüset nüngdakba dang masü saka tanüla nüngdaktema agütsür. Sarasadem sentongtem, kati ka ajurua sensaksemba aser sentong balala ayongzüka takoksa ajururtem yarir” ta Walton-isa ashi.
Bishop of Kensington-ia kibongtem den külemi sarasadem sentong nung aden aser parnok süneptsü. Arogotemi temeim aser mulungsoa teyari agütsür ta pai ashi.
“Kodang lendong atalokdir, emergency services-i taküm bendanga agüja yarir aser parnok sülen local arogoi teyari tapu balala agüja yariteper” ta Bishop of Kensington-i ashi.