London:Parliament kima injang akha, nisung aika yiru

London, March 22 (Agencies) : Parliament kimai nisung ka kotari amer asemoka aitba sülen Westminster Palace kima injang asem akha.
Iba sülen nisungtem artepa asemshidang New Palace Yard nungji nisung ana yirur liasü. Tayimtsü aser gari ambulance ka arua yirua aliba nisungtem nem mozü agütsü.
Lendong atalokba tesem nung sepaitemi shinga marudaktsüi nokdang aser Parliament Square telungi gari kata maitdaktsüi shibanga ayu.
Osang ajanga ashiba agi, linük Ato Kilonser Teresa May junga lir.
House of Commons senden athiba sülen Commons lenir David Lidington-i, “Kanga tatalokba tamajung ka atalokogo,” ta MP tem dang ashi.
“Police ketdangser kati kotari agi atsüngsangji police temi khasetogo ta angashir. Yirur alirtem yaritsü asoshi tang tayimtsü ambulance ka mazüngi mapa inyakdar. Ajisüaka police aser iba tesem nung security tem ket nungi osang magitep tashi ni osang tejangja magütsütettsü,” ta pai ashi.
Tenük kuli angurtemi ashiba agi, iba tesemi nisung ka kotari tema nung amer asemoka ait.
Jayne Wilkinson-i, “Onoki Big Ben indang noksa agitepa aliba mapang arishi küm 40 tain, Asia nunger kati kotari inch tenet nungi ti tashi amer onok tsütsüi asem yonga aru,” ta ashi.
“Iba sülen injang ola asem angashi. Onok lenmang ajanga orr reprangdangdang iba nisungji ali nung azü yima longdaker liasü,” ta lai ashi.
“Pa Parliament tsütsüi asema aoba ajanga police temi arishia liasü,” ta lai shisem.
La den külemi alisang David Turner-i, iba mapang nisungtem nungtepa asemtep meso, ta ashi.
Nisungtem asemtepji ngua kanga bangkatep, ta pai ashi.
Harvard Centre for European Studies nungi Sikorski-i, “Westminster Bridge nung gari ka agi nisung 5 laodaktsüogo,” ta tweet asü.