Long March museum nung mongodangba oset kar angutsü

Beijing, April 17 (Agencies) : China nung May ita tiyongtsülen ‘Red Army’ tem ‘Long March’ asüba nüngtem nung museum ka lapoktsütsü sentong lir.
Iba museum nung ayutsü atema Red Army sepaitem indang kinungertemi tang yongi oset 270 dak tema tenla agüja lir.
Iba museum ya entrepreneur Fan Jianchuan-i sen teperi agüja yanglu aser Jianchuan Museum indang kosang ka mesüka alitsü.
Sichuan province kübok Dayi county nung Jianchuan Museum den sentaktepba museum 12 shi lir. Item museum tem nung nüngo aser tesüiba mapang indang osettem aika aliba ajanga China nung ibala osettem bendena ayuba tesem tulutibaji parnok lir.
Sepaitem kinungertemi agütsüba oset rongnungji sepaitem indang coat, bugles (kongki tapu ka), tatalokba aser ajangshiba otsütem aser autograph albums tem dena lir, ta Xinhua news agency osang ajanga metetdaktsü.
Iba museum tasazükji sq metre 4,000 lir aser yangji nisungi yanglutetba oset den parnok tesüiba mapang kilometre 12,500 ‘Long March’ aoba mapang tatalokba otsü indang audio aser video kar dena angutsü.
China nung Communist Party lenisüba kübok sepaitem dener parnoki nükjidong tasen ka asoshi apuso aser parnoki 1949 küm takok angu.
‘Long March’ agi Sichuan province tuluba ka amshi aser iba mapang tongtibang rara aika ataloka liasü.