Longchem nung joint co-ordination senden agi

Dimapur, July 16 (TYO) : July 15, 2015 nü Agriculture Parliamentary Secretary, Dr. Benjongliba-i Mangkolemba ADC aser SDO (C) na den Longchem yimtsüng nung departmental officers aser joint co-ordination meeting agiogo.
Iba senden nung Dr. Benjong-i ketdangsertem aser mulungtet teloktem dang pei teinyaktsü angateta inyaktsü ayongzük.
Mokokchung district kübok EAC Headquarters tejentem rongnung Longchem ya ka lir, anungji iba EAC Headquarters renloktsü atema inyaktsü, ta paisa ashi.
Longchem nung Government Departmental officers 13 lir saka parnok rongnungi ketdangser trok dang aden. Iba ya ajanga ketdangsertemi tashi mangaba aser pei teinyaktsü mapa meinyakba sayur ta Dr. Benjong-isa ashi.
Paisa administrative officer aser public dang Longchem dak sendakba osangtsüsang mapangshia metetpelatsü ayongzük.
Senden nung Mangkolemba ADC, Imtiwapang Aier-ia o jembidang, pa lenisüba nung telok taseni Mangkolemba Sub Division renlokdaktsütsü atema inyaktsü ta ashi.
SDPB senden alidang onüktem benoktsü aser iba sülen bangdak ketdangsertemi dangi abentsü ta Mangkolemba ADC-isa ashi.
Paisa EAC, Longchem dang iba senden nung madenba ketdangsertem indang osang hopta ka tsüngda agüjang pa nem sangokjang ta tetuyuba agütsü.
Iba senden agiba sülen Dr. Benjongliba-i Lirmen yim süngküm tasen lapoktsü.