Longchem nung Vacation Bible School agi

Dimapur, August 3 (TYO) : July 21-26, 2015 tashi Longchem Baptist Arogo nung tila tanurtem atema “Triumph Always” omen nung ajemdaker Vacation Bible School (VBS) kanga dang takok aser temoatsü nung agiogo, ta arogo secretary A. Chuba Longkumer-i sangdong ka nung metetdaktsü.
Iba sentong nung tila tanurtem ajak agi parnok 80 tashi aden aser Camp Director ji Wb. W. Bendang, Chumukedima Arogo Secretary liasü aser pa den yariteptsü atema par jala Kr. Imtijungla aser par kiyonger Sp. Lanuyanger dena arua tesayuba jenti tanur dang sayua liasü.
Iba sentong nung tanurtem dang masü saka tsürabur dena kanga dang temoatsü agia liasü. Tsüngremi par taküm aser sempet Pa sentsüwangshi asoshi maneni moajang ta sarasademtsür. Iba den külemi Chumukidima Arogopur ajak dang par tenzüker nübu melaba asoshi kanga dang pelaba shisemer, ta Longchem Baptist Arogo sangdong nungsa shia lir.