Longchem PHC nung angati agi temang anepalutsü

Dimapur, Rongchii/April (TYO): Mokokchung district kübok Longchem PHC nung April 17 nü angati agi temang anepaluba camp ya achaayanga kaogo, kong Longchem temeket nung aliba yimtsüngtem nungi nüburtem arua temang angati agi anepalua liasü.
Iba health mela ya Department of Health & Family Welfare Kohima Nagaland kübok District Health Society, Mokokchung-i achaayanga agi.
Mela tenzükba sentong nung Longchem, Adhoc Town Chairman-i, helath team pelashishia jaok aser kinük nung aliba nüburtem atema department-i iba amala camp ayongzüka katsüba atema kanga pelaba lemsatep.
Nisung ajak agi parnok 227 temang anepaluogo aser parnok nem angati agi mozü agüja liasü. Tepu parnok 16 indang loktoktsü aser parnok 9 indang tepu nung tapok aliba anepalutsü. Tenük majunger parnok 68 tendanga liasü aser parnok rongnung 7 dak cataract puteta tenük maneni anepalutsü atema IMDH-i aotsü tetuyuba agütsü. Camp mapang Laparoscopic sterilization 2 aser Copper T insertions 4 agia liasü. IEC staffs temi FGD& IPC agi aser health programme balala dak sendakba nung leaflets lemja liasü. DVBO Mokokchung aser team-i ASHAs tem nem camp mapang ramen tashidak samatsütsü asoshi jenjang agiba dak sendakba nung training agütsü.
Iba camp ya Deputy. CMO, DVBO, Dr.Ademla Gynaecologist & lar laparoscopic team lenisüba kübok temeket nung aliba health unit tem nungi MOs, Dental surgeon, Opthalmic Assisstant, IEC staffs aser NHM staff aser temeket yimtsüng nung ASHA parnok 6-i iba camp kanga takok ngua katsüogo.