Longjang yimtak 43 buba Mongsen Ait Marok asayamong tenzükogo

Asayamong tenzüktsür, Limachuba Jamir (Abelen nungi  5 buba) den mezüng match asayatsüpur, Kanimu Citizens Club o Yimsen Youth Club asayartem; asaya ketdangsertem aser Mongsen Ait Club ketdangpurtemi agiba arok noksa ka yangi angur. (Longjang, December 16)

Longjang, December 16 (TYO): Mongsen Ait Club-i ayongzükba 43 buba Mongsen Ait Marok football trophy Longjang yimtak Bodbarnü nungi tenzükogo. Tanü iba asayamong NSCN/GPRN Chaplee Kilonser, Limachuba Jamiri tenzüktsü.
Iba asayamong nung telok 10-i shilem agidar. Temaba jenjang angur telok nem senpet sen 40,000 den takok marok o kulikaket aser tanabuba jenjang angur telok nema tanabuba jenjang marok o kulikaket den senpet sen 20,000 agütsütsü. Iba den ano nija shilem nunga Best Player, Highest Scorer, Best Defender aser Best Goal Keeper jenjang angur nem senpet sen agütsütsü renema lir.
“Taoba mapangbo saisapong ya temang anema alitsü atema dang asaya aru saka tanübo saisapongtsüji pei mapa kümdaktsüba den külemi, rongsenkettsüng aser yimjung bener arutsütsü tongti luyim ka kümogo,” ta tongti tesemdanger, Limachubai ashi.
“Naga nunger dak saisapong balala asayatsü sempet lir saka asenoki meranga meinyakba ajanga sempet tajungji amajok kümdaktsür,” ta shia, asayartemi mangdang tajung aser temulungtetba tulu yur tazüokba nung nendaka aser meranga asayatsü tayongzükba olen ka pai sangoktsü.
“Saisapongba ajanga tajangzük jenti bener arutsür saka asen liso nisungtemi asayamong nung dang khen asayarbo asayaji toktsür. Anungji, asayamong mapang dang masü saka mapang telatet yur anogoshi terenemshiba agia asayara, asenoki tangar menepa asayatettsü,” ta pai ajungshia ashi.
Lonjang ya Nagaland nung 1 buba Chief Minister, P. Shilu Ao aser Aliba Imti nunger amala Naga lenirtem adokba yimtsüng ka aser lenla aika nung tangar dang nungi alaketa tejakleni aoba tongti yimtsüng ka lir ta pai tenüngsang agüja liasü.
“Yimdak yimtsüng nung mezüngpur asütsü raktepdang mesüra election nung yimtsüng o yimtsüng na tsüngda meputep adoka tesendaktep aiben mejungi akümer anungji, aseni iba amala yimaya tamajung melenshitsü nungdaka kümogo,” ta pai lemsatep.
“India sorkar den taküm August ita 3 nü agiba Frame Work Agreement tezüngzüktep dak ajemdaker Naga nunger ajungai agizüktettsü ken o ajak jembitsü renema lir. Linük ana tsüngda aküm agütsüba den külemi tashi lemsatepa kati ka dak metaloktepa aotsü tangatetba nung iba tezüngzüktepji zülutepa agi,” ta pai Naga yimten den sentakba osang jangjashitsü.
Paisa ashiba agi, India’er parliament winter session senden nung tawa agiba tezüngzüktep den sentakba onük benoktsü sentong renema liasü saka mapa kar anosa metembangteti aliba ajanga iba onükji parliament senden nung mebenokteti süidaktsü.
“Nübur kari India sorkar den agiba tezüngzüktep benjatsütsü nükjidong nung osang kakettem nung onük balala zülua adoktsütsü akok saka iba jagi nüburtem memangdaktsütsüla,” ta pai tekümdangtsü olen ka metetdaktsü.
Tanü sentong nung tongti tesemdanger den meina arur rongnung Imcha Lkr (Talk Secretary), Maong Ozüküm (Major Rtd), CAO (Caretaker), Ao Region, Dy. Chaplee Kilonser nunger densema liasü.