Longkak ait ataba sobaliba

Kinü tanur majep tashibo mama meyongdaktsüba tetsü amato nübortem longkak mait tashibo tagütsütsü aser inyaktsütsü tim asüyonga kecha magütsü aser meinyaktsüi timtemdaktsüba sobaliba tamajung ka Nagaland nung tentetogo. Iba sobaliba tamajung ya tentetba ajanga nübortem dang masü saka government-a kanga akoksar. Aji oda, nübortem longkak mait tashibo government-i lenmanga meyanglutsütsü, mozü kidang doctortema shitak meyoktsü aser tesayurtem nem ita sena magütsütsü ta asüba sobaliba yabo anentsüla aser longkak maityonga government-i nübortem asoshi teinyaktsübo inyaktsüla. Taküm 2017 küm ya balaka longkak aitba küm ta janütsüka January ita nungi tang tashi telok-telok longkak ait manener. Aji oda, January o February na ULB election dak sendakba maparen nung nübortem longkak aitba mapang liasü. Aji oda, ULB election-a nübortemi taküm agi tenlaa longkak ait nung dang magii thitemogo. Ano, iba sülen Hindi tesayurtem nem ita sen magütsüba ajanga anogo aika longkak aitba asenoki nguogo. Parnoka longkak aitba agi ajak mesüaka ita sen angu tenzükogo. Ano, National aser state highway repranger kibur mali amato küm aika meyanglushii gari lenmang agi ayong ama küma aoba timtem aser takoksa maremteti Mon district len Tizit Area kaketshirtemi aser külen Kohima o Wokha na tsüngda National Highway lenmanga tulurtem alu lenmanga memeyong kümdaktsüba tia nung Rengma aser Lotha nungertemi longkak aittsü ta government amokmerenba sülen dang government-i item lenmangtemji yanglutsü ariteper amai angur. Ibaji dang masü saka ano Phom kaketshirtemi Longleng District mozü kidang doctor shitak maliba anema longkak aittsü ta metetdaktsüba sülen tang government-i Longlengia doctor yokogo ta angazüker. Atangji, state government mapa nung inyakertemia parnok nem ita sen tutsütsü anendaka aliba metutsüba ajanga anogo ishika longkak aita office nung mapa meinyak amongba sülen dang governmenti parnok taginüba ataloktsüogo. Ano, yakanü nungi tenzüka Nagaland nung RMSA tesayurtem nem ita sen magütsüba ajanga parnok longkak aitdagi. Iba denji ano All Nagaland Pre-Service Teachers’ Association purtemi anogo 30 tsüngda primary school nung tesayur 532 shimtsü mapa tazüng liaka meshimi aliba nungji parnok shimtsüla ta takangba agüja lir. Ibaji mataloktsüra parnoka longkak aittsü aser ashiko tanü government sobaliba dak keta aliba ama longkak anogo ishika aitdaktsür külen parnoki bilemba ataloktsütsü südi. Aji oda, longkak mait tashibo inyakertem nem taa magütsüra koda asütsü ? Nagaland nungbo nübortem longkak maitra National aser State Highways meyanglushitsü asü ?  Nübortemi longkak aita meshi nung dang mozü kidang doctor aser school nung tesayur agütsütsü asü ? Nagaland jungnüra government-i nübortem longkak ait matai kechi inyaktsü tim itemjibo mapang shitak-shitak nung inyaka aotsüla. Nübortem longkak aitbaji aitnüseta aiter masü mesüra government laodaktsütsü bilema inyaker masü saka government-i parnok tangutsü tim magütsüba agi tejashi marem longkak aiter. Government nung alirtemi nübortema chiyongtsü aser kibong nüngdak asoshi sen nüngdaker ta bilemtsüla. Aji oda, nübortema shirangdang government mozü kidang taneptsü angutsü atema doctor nüngdaker ta bilemtsüla aser government school nunga kiojen aser tesayurtem shitak nüngdaker ta bilemtsüla. Tanü government nung alirtem jakla ya reprangdangra, nübortembo chi mechiyongaka mayatsü amai parnoki bilemer südi. Aji oda, nübortembo meshiranger amai, nübortembo private school nung angati azünger amato, nübortembo government-i magütsüyonga senotsü peria angur amato government nung alirtemi bilema alitsü akok. Iba ama bilemba jagi tanurtem long agi asayadang awatsüng nung alutembo yiruyiponga asü ama, tanü government nung alirtem asayadang nübortembo temang nung sentsüa melena kongrasükdagi !