Longkak aitba ajanga Nepal-i nungdakba osettsüset bener motetter

Kathmandu, September 24 (Agencies): Nepal-i par linük temzüng tasenba agizükba sülen kasaji agizüktsü memulungba nüburtemi tang kanga sashia longkak aitba osang jangjaogo.
Nepal nung talisa, par linük anülulentip tsütsülen kanga sashia longkak aita ajanga par linüki aitsü ayamesoba totzü abenba tanker gari aser nungdakba osettsüset abenba truck gari 1000 dak tema arrtsülen India lushi nung tanü agi anogo 3 buba tashi anendaka aliba osang bushitetogo.
India arrtsülen, Nepal lushi nung tentetba Birgunj jila nunga longkak aiter nisung 400 dak temai police ketdangsertem den tanü Brehostibar nü kanga sashia raratepba osanga bushitetogo.
“Totzü abenba tanker gari 1500 tashi Jogbani ajanga Nepal anülulentip tsütsüleni anogoshi aiür. Ajisaüaka, Nepal nüburtemi kanga sashia longkak aittsü tenzükba yong tanker garitemi Nepal telungi mitetti joko anogo 3 abensaogo,” ta India sorkar ketdangser, Sri Prakash-ia osang jangashitsü.
Nepal nung nüburtemi longkak aitsü tenzüker tanü tashi nung ishiba agi nisung 45 shi tepsetba osang jangjaogo.
Ano külen, tang longkak aita alirtem den ajurutepa angatetteptsü asoshi Nepal nung tentetba tongti yimtenren telok 3-i Nepal Forest Minister, Mahesh Acharya shimtetba osanga jangjaogo.