Longkak aitdang raraba ajanga democracy tashi meitdaktsür: Tir

New Delhi, Aenjeti/January 31 (Agencies): Hokolbarnü Parliament House anaprongla nungi züngsemtem den jembidang Tir, Ram Nath Kovind-i, longkak aitba mapang nung rara ajanga democracy tashi meitdaktsür, ta ashi.
Central Hall, Parliament nung jembidang pai, “O lemtepba aser o toktepba ajanga democracy tashi itdaktsür, ibaji ozü sorkar tangatetba. Iba denji külemi longkak aitba tenüng amer rara adokdaktsüba ajanga linük aser loktiliba tashi meitdaktsür,” ta metetdaktsü.
February 1 nü Union Budget benoktsü lia tanü Parliament House anaprongla nungi züngsemtem den jembidang Tiri item o ya jembiogo.
Brihostibarnü linük yimtiba, Delhi kübok Jamia area nung kaketshirtemi Citizenship Amendment Act aser National Registry of Citizens anema longkak aitba mapang nung tebur kati pistol agi kaketshir ka dak akahba sülen Tiri item o ya jembi.
Parliament House anaprongla nung CAA agizükba ajanga linük tebuti, Mahatma Gandhi taginüba ataloktsüba atema ni pelar, ta pai ashi. Iba sülen opposition party temi pai jembiba oji ashishia liasü.
Kovind-i ashiba agi, Arrla 370 agienba ya putiotsü ka asütsü, kechiyong iba ya ajanga Jammu & Kashmir aser Ladakh nung terenlok mapa inyaktsü atema lenmang lapoktsür, ta ashi.
“Parliament House anaprongla nung 2-3 majority ajanga linük temzüng nung Arrla 370 aser Arrla 35A agienba ya putiotsü ka dang masü saka iba ya ajanga Jammu & Kashmir aser Ladakh nunga liromedem terenlok mapa inyaktsü atema lenmang lapoktsütsü,” ta pai ashi.
Tirisa Ayodhya mangatettep li ken o nung Supreme Court obendang nüburtemi agizükba atema tenüngsang agütsü.
Tanep Ato kilonser, Narendra Modi-ia osangbenertem den jembia liasü.
India-i alima tensa nungi maongka agitsüla, ta shia Modi-i, “Asenoki iba senden (Budget) nung rongsenkettsüng dak sendakba onüktem nung dang rangloktsüla. Rongsenkettsüng onüktem nung House anaprongla nung o junga tokteptsüla. Alima rongsenkettsüng tensa nungi India-i maongka agitsüla,” ta ashi.