Longkak aiter nisung ka longkak aitba tesem nung kibong aküm

Jaipur, February 24 (Agencies): Jaipur nung Special Backward Class (SBC) quota meshia longkak aiter, arishi küm 26 tain, Devraj Gujjar, pa longkak aitba tesem nung kibong aküm.
2016 küm December ita nung Rajasthan High Court-i par state nung SBC quota agientsüba sülen, Gujjar ya densema parnok nisung ter, February 16 nungi tenzüka iba quota agientsüba anema longkak aiter.
Rajasthan Public Service Commission ajanga parnok ya lecturer inyaktsü asoshi shimtet, saka High Court-i SBC quota agientsüba ajanga parnok nem mapa nung shimba shidi magütsü. Iba ajanga Dausa district nung aliba Sikandara tesem nung parnoki chi mechiyongi longkak aittsü tenzük.
Gujjar aser Mamta kibong akümtsü ya ita ti tejaklen renema jembir liasü aser Gujjar-i tena kiyimba anogo thinentsü asoshi mümolungba ajanga pa longkak aitba tesem nung tena kiyimba sentong agi, ta Gujjar-i ashi.
“Tena kiyimba sentong agitsü asoshi par kinungertemi sentong ajunga renemtsü,” ta Gujjar-isa ashi.
“Nisung ka taküm nung kiyimba aser mapa naprong ya tongtibang lir. Mamta-i molungba sülen küna iba tesem nung kiyimba sentong agitsü renem. Ni maneni longkak aitba mütoktsütsü. Ni ozü medemertem mashioktsütsü,” ta Gujjar-i sangdong.
“Iba tongpang nung ni kü kinungbu den tena lir. Pa mapa ajanga ni kanga nüma atanger aser onoki meshiba mongutetra, nia parnok den adentsü,” ta Mamta-ia ashi.
Tena kiyimba sentong atemba sülen, Gujjar-i maneni longkak ait tenzük aser Mamta bo Gujjar tsürabur kidangi ao.