Longkhum Vegetable Village nem Tata gari ka agutsü

Kohima, Luchii/Dec. 03 (TYO): Tanü Horti-Scape, Kisama nung Advisor Horticulture, Mhathung Yanthan-i Longkhum Vegetable Village nem Tata Yodha gari ka agutsüogo, ta kedangsertem osang ka ajanga metetdaktsü.
Iba sentong nung jembidang Mhathung-i, pai Longkhum yim semdangdang iba yimdak aonsotsü lu ayimba inyakyim ajanga melungsüa liasü, ta ashi.
Paisa, iba yimdak aluyimertemi akhi tejen yimya nung alu chia aluyimba yimya melenshia aluyimer, aser tim inyakyim ajanga aluyimba ajanga tsük lu ayimba dang nungi aonsotsü lu aser süngjang lu ayimba ajanga 10 ben agi tali taangzük angur, ta metetdaktsü.
Paisa, state tesem ajaklen aluyimertemi Longkhum-i inyakba ama mozü medeni süngjanglijang aser aonsotsü lu ayim nungbo ajungtsü, ta ashi.
Agriculture Leadership Award 2018-i Nagaland nem Best Horticulture State agutsüba aser Indian Council Food & Agriculture-i Transforming State Horticulture sempet agutsübaji Longkhum Vegetable Village ajanga lir, ta pai tenüngsang agutsü. Advisor-isa Longkhum dang aluyimbaji kasa tesem nungsa ayimtsüla, ibaji ajanga teyari aser terenlok angutsü aser yim atema tarutsü jenjang ajungtsü, ta ashi.
Aluyimertem asoshi aonsotsü belentsü atema gari nüngdak ta reprangteta Advisor-i Longkhum Vegetable Village nem Tata Yodha Vehicle programme kübok truck ka agutsü.
Kasa sentong nung jembidang Joint Director, Horticulture, Quotovi Wotsa-i, Kohima, Tuensang, Phek aser Mokokchung kübok yimtsüngtem ajak nung amai Vegetable Village tenzükogo, ta metetdaktsü.
Paisa, Longkhum Vegetable Village ya model vegetable village ka mesüka lir, kong bengana, cabbage aser mersü tsünüteta markets den link yur inyaker, ta ashi.
Paisa, iba yimdak nungi aluyimertemi mozü mamshiba aonsotsü aser süngjanglijang dang tsünütettsü imlar, ta ashi.
Paisa, parnoki züsentetba nung tashidak aser virus lira Mokokchung nung aliba labs nem osang metetdaktsütsüla, ta metetdaktsü.
O tatsüka jembidang Longkhum Village Council Chairman, I. Sentonglemba-i, Naga nunger timbaka aluyimertem liasü, ajisüaka mapang den terenlok melenshia farming agi melenogo, ta ashi.
Village extension worker, Mokokchung District, S.I Aren lenisüba nung Longkhum yimdak aonsotsü lu ayimba tenzüka liasü aser iba yimdak aluyimba tsütsü terenlok ngua 2002 küm Horti department-i Longkhum yim ya potato seed village aser 2004 küm vegetable village ta züngshia department-i aluyimertem nungiter.
Chairman, Longkhum vegetable village, Rongsenmayang-i, state aser linük atema aonsotsü, süngjanglijang aser tsük züsentetertemji aluyimertem lir, ta metetdaktsü. Paisa, Dimapur aser Kohima-i aonsotsütem belenaka ana nung marketing facilities mali, ta shia pai sorkar dang aluyimertem nem senotsü den marketing facilities agutsütsü mepishi.
Iba sentong nung Deputy Director Horticulture, Mishento Ghap-i lokti pelaa agizükba o jembi aser Deputy Director Horticulture, Mesetuonuo-i tepela anküp o jembia liasü.