Longkong Kaketshir Telongjem tenzüker küm 75 jungogo

Longkong yim, 6 Jan (TYO): Longkong Kaketshir Telongjem (LKT) tenteter küm neter pungu (75) ajungba platinum jubilee sentong “Lirumedem Shisaluyimer” omen dak rangloker 6th Jan, 2022 nü Longkong Baptist Arogo tekülem kidang takok ngua mungogo.

Sentong akhümdong PWD (Housing & Mechanical) minister, Wb. Tongpang Ozüküm-i jembidang, Jubilee ya pelatepa aser tenüngsang agütsütepa amungba benjong ka dang masü, saka ibai tesüiba reprangshiba den tanü tensa asadanga tarutsü atema asalentong tajung yangluba mapang ka lir, aji oda, jubilee tenüng nung yimertem tali putepshiba den Tsüngrem nem tenüngsang agüja amungtsü ayongzük.

Tanü Nagaland nung kaketshirtem kümshi graduate aser post graduate asürtem aika akümer, degree balala angur aika saka chichiba education angur kaketshir kanga ajema lir, ta ashi. ‘Tanü putu azüngzülu metetba kisüngji teperi masü saka chichiba education akartem alimai nungdaker, degree bo lir saka tetangokdak maka aika lir, anungji, chichiba education angutsü merangtsüla”, ta paisa kaketshirtem ayongzük.

Paisa lanurtem dang inyakdaktsünüba o ka ashidang, mapang ya kanga tongtibang kechiyong takar-sensaker ajak mapang kasa ghonda 24 dang angur, anungji, nüngdak makaba mesüra amajok nung mapang melalui awashi meteta amshitsü asoshi ajungshia liasü.

Pei sobaliba aser oshi wazüka ayutsü olen ka ashidang, oshi ya sobaliba tongtiret aser oshiji pei maitsü (identity) lir, pei tetsü oshi mashibaji konang masü maaksü tulu lir, mekümdangra aser tang amai dang ora meilongi asen oshi ya samatoktsü menua maka, anungji, pei tetsü oshi mesentoktsü asoshi paisa metetdaktsü. ‘Na kong lidir liaka pei yim aser pei nüburtem kodanga mamatoktsüla’ asoshi paisa shisem. Tongpang-isa LKT nüngtem adoktsü aliba nüngo kaket ka sayatsü.

Sentong nung Retd. Senior SDEO Mokokchung, Wb. S. N Sungkum Jamir-i tongti o jembia liasü. Iba den LKT tir Sb. Mapuyanger Jamir, Langpangkong Kaketshir Mungdang tir Sb. Washimong Sadem Longkumer, taoba LKT tir Wb. I Rongsen Lkr, Longkong Village Council chairman Wb. M Lepden Jamir, taoba minister Wb. M. Jongshi Jamir, jubilee planning committee convener Wb. T. Tsükti Jamir aser ano tangar kar ajanga sentong nung shilem balala agia liasü.