Longkong yimtak HWC lapokogo

Longkong (Mokokchung), Aami/June 21 (TYO): Longkong yimtak Ayushman Bharat nungi Health & Family Welfare Department Govt. of Nagaland ajanga Sub-Centre jenjang nungi Health & Wellness Centre (HWC) upgradation süa ki tuluba yangluloktsü asoshi sen 3,00,000/- (lakh asem) agüja Community Health Officer (CHO) yoka iba ki tuluba aser tajungtiba renemteta June 20, 2019 nü Dr. Moakala MO ajanga lapoktsüogo, ta tanü Chairman VHC Longkong, Temsülepzük aser Secretary VHC Longkong, Meyisangla nati sangdong ka ajanga metetdaktsü.
Dr. Moakala-i Health & Wellness Centre nükjidong indang jembidang, iba ya Ayushman Bharat nungi achaayanger aser yangi package 12 (ter ana) tashi lir aser tongtibangsa yimtsüng nung alirtem meta talang nung aliba jila aser yimtitemi maoba ajanga sentsüh metsüi asen anasa anepalutsü atema lapoktsür, ta metetdaktsü.
Iba sentong ya Kavi CHO leniba nung agi aser Longkong Baptist Arogo Pastor, P. Imkong Aier-i ki meshiteta sarasademtsü.
Iba sentong nung Dr. Moakala MO den Village Council aser VHC nungi o tatsütsü jembia liasü. Item mapa tajung asoshi Department aser teyariteper ajak dang kanga pelaba VHC Longkong ajanga lemsatepogo.