Longla nung lenmang ka semzük

Dimapur, December 13 (TYO): December 12, 2017 nü Longla Village B Khel colony nung tawa yangluba lenmang tasen ka semzükogo.
Iba lenmang ya kiyong nung alirtem aser tangartemi senotsü, oset balala aser nübo tenlatepa yangluba liasü.
Metre 300 talang lenmang lapokja tongti tesemdanger Village Council Chairman, C.Thungbemo Kikon-i, akhidang tetsü-tebou nungeri amenokba yim nung longpak jenti lir ibayongji long jara feet 6 shi yanglua longsang agi ateptsüji mapa kanga tasak liasü, saka temelungtetba tulu nung inyakba ajanga takok ngua lenmang yangluogo, ta metetdaktsü.
Paisa, pei sasa tenlatepa inyakba ya mapa tajung ka lir, aser lokti nung terenlok atema tangaria iba nungi tatishitsü agitsü imlar, ta ashi.
Iba maparen achaayanga Tsatheo Kikon den yaritepa inyaker, K. Janbemo Kikon-ia, kiyong nung iba ama lenmang ya mapang talangka nungi nüngdaka liasü, aser nüburtemi amalitepba ali agütsüba den külemi nüngdak balala tenlatepa inyakba ajanga tanübo iba lenmang asangsang nung atalokogo, ta ashi.
Longla Pastor, Wobemo Kikon-i iba lenmang meshiteta sarasadem. Paisa kiyongertemi Khristmas atongtsü mapang nung lenmang tasen agütsüba atema pelaba shisem.