Longleng dist nung Polytechnic lapoktsü rakteper

Dimapur, June 17 (TYO) : Longleng district nung Higher & Technical Education department kübok Polytechnic ka lapoktsü asoshi Yongnyah nung shimteta lir saka iba tesemji melendaktsünüa Longleng anasa aliba yim asem Hukphang, Bhumnyu aser Orangkong telongjem teloki Chief minister, T.R.Zeliang aser Deputy Commisioner, Longleng na dangi züluogo.
“Tang Yongnyah nung shimteta aliba tesemjibo gari lenmanga majung aser Longleng district Headquaters nungi kilometer 24 pilar lir. Ano, iba denji yangji bank aser post office kecha lapoka maka. Iba jagi yim asem Hukphang, Bhumnyu aser Orangkong nungertemi tesem asem rongnung tajungba ka agitsü asoshi tenla agütsüogo, saka item tesemtemji tenem kolaklen asüba agi magiba kuliji tim masü kechiyong Nagaland ya tenem lima aser sorkar kiojen  aika tenem kolak nung dang yanglua lir ta yim asem telongjemi metetdaktsü.
Anungji, shinga tsütsüa tejak mereprangi tetemsü tesem ka shimtettsü asoshi ano tanaben tesemtemji reprangshitsüla ta parnokisa sorkar nem takangba ka agütsüogo.
Kasa onük nung Longleng district kübok Longleng temeket aliba yimtsüngtemi Chief minister dang Polytechnic College lapoktsü alibaji Longleng anasa dang lapokdaktsüner ta takangba agüja liasü.
Ano, tan ita June 15 nü yimtsüng troki Deputy Commissioner dang Longleng district nung Polytecnic lapoktsü asoshi tesem shimteta alibaji ano ken reprangshitsüla ta takangba ka metetdaktsüogo.