Longleng district-i all India cooperative week among

Longleng, Yimpoksüi/November 15 (TYO): Hokolbarnü Longleng district kübok Bhumnyu village council Hall nung Longleng district-i 66buba All India Cooperative Week ayongzüka mongogo; iba sentong ya “Role of cooperatives in New India” oamen nung ajemdaker agi, ta ta ketdangsertem osang ka ajanga metetdaktsü.
Okila jembidang Assistant Registrar of Cooperative Socoeties (ARCS) Longleng, I. Chume Chang-i, state rongsenkettsüng renloktsü aser pei taküm jenjang tajungba akümtsü atema registered societies-i department den amalitepa inyaktsüla, ta ayongzük.
Chang-isa, cooperative societies ya state nung tongti bang department ka lir, keciyong iba department-i aluyimertem aser self help groups rongsenkettsüng ajungkettsütsü atema grass-root level nungi inyaker, ta ashi.
Paisa, shialem agiba societies aser züngsem ajak ya voluntary service ka ama inyaker, anungji amalitepa inyaktsü nüngdak, ta ashi.
Society ka register asüba sülenbo mapa tembanger ama mebilemtsüla, aser nükjidongji loan/subsidy agitsü atema dangbo masütsüla, ta paisa ashi.
Inspector Cooperative Societies (ICS), Lipoktangit Ozukum-i cooperative societies tenzükba otsü ashi. “Aso ka piyong committee balala reports aser cooperative legislations balala ajanga linük nung cooperatives lenla reprangshi. Ibaji Aso 19buba tetenzüklen British nunger yimsüsüba mapang nungi tenzüka, nüchiso magudang aser nüchiso anguba mapang tashi nung linük nung cooperatives ajungkettsüba aser sponsorship nung state-i tongti bang shilem agiogo. Ajisüaka tesüiba küm ishika tsüngda alima tensa nung apir cooperatives nung temelenshi benoktsüsa aküm,” ta pai metetdaktsü.
Paisa shilem agirtem dang cooperative-voluntary aser open membership indang tangatetba onük tenet lemsatep, item rongnung democratic member control; member economic participation; autonomy & independence; education, training & information; cooperation among cooperatives aser concern for community densema lir.
Kasa sentong nung Bhumnyu Village Council chairman Ongpa aser Phokchi Farming Cooperative Societies Ltd S. Angam natia jembia liasü.
Angam-i Longleng district cooperative societies department-i registered societies aintsü atema kanga meranga inyakba atema tenüngsang agütsüba den külemi nenoki meranga inyakba ajanga aluyimertem kanga tajangzük nguogo, aser ibaji ajanga socities ainba kuli angur, ta ashi.
Angam-isa registered societies balala dang loans agitsü nükjidong kija atema inyakba ajanga ner society aser district tenüng menüktsütsü, anungji nenoki society register asüba mapang agütsüba nükjidongtemji atangji nung inyaka tatishitsü tajung sayutsüla, ta ayongzük.
Paisa, department-i maneni nendaka inyaktsü aser len sayutsü imlar, ta shisem.
Sentong tetenzüklen Bhumnyu village Baptist Church pastor-i sarasadem aser ARCS office Longleng LDA, Yongshet Phom-i tepela anküp o jembia liasü.