Longleng District nung ‘Beti Bachao Beti Badhao’ sentong agi

Dimapur, October 10 (TYO): 2011 küm census nung Longleng district nung child sex ratio majungba atema tebilemtsü kaa tanü October 10, 2017 nü Local Football ground, Longleng nung District Administration den Longleng Town Students’ Union-i longjemer “Beti Bachao Beti Badhao” sentong ayongzüka agiogo.
Iba sentong nung Longleng district kübok school balala nungi kaketshirtem aser tesayurtemi shilem agia liasü.
Iba sentong tenzüka Phom Lampong junction nungi local football ground tashi tesünep nung yimdong süa jaja, iba sülen onük tatsüka jembidang CDPO Longleng, Tauhong-i kaketshirtem dang, kidang aser school naprong nung tetsür aser tebur na mebendangi kasa züngshitsü ayongzüka liasü.
Paisa BBBP mapatong metetdaktsüba den külemi iba ya lokti nung koda tongtibang, ibaji lemsatepa liasü.
Kasa sentong nungsa EAC Head quarter-ia kaketshirtem dang tetsürtem bendanga mamshitsü saka parnok akhümtsübua meimtsü ajungshia liasü.
Tesülen EAC-i ketdangsüa tanurtem nem tenangzükba agidaktsü.
Iba sentong tembanga LTSU executive züngsemtemi anküp o jembi aser lokti sarasademba sülen kaketshir teburtem aser tejaokertemi signature campaign nung shilem agi.
Iba sentong nung school balala nungi kaketshirtem aser tesayur senteper parnok 300 shi shilem agia aden.